Netflix akym platformasy 82,7 mlrd dollara Warner Bros. Discovery kompaniýasyny satyn almak barada ylalaşygyň gazanylandygyny habar berdi.
Şertnama tamamlanandan soň, platforma Warner Bros. kinostudiýasyna, HBO we HBO Max kanallaryna, şeýle-de filmleriň we seriallaryň giň toplumyna eýe bolar. Kataloga “Garri Potter”, DC Comics, “Tagtlaryň oýny” we “Soprano” älemi boýunça taslamalar hem-de XX we XXI asyrlarda döredilen köp sanly filmler girýär.
Platforma Warner Bros. Discovery-nyň filmleri kinoteatrda çykarmak tejribesini we häzirki işlerini dowam etdirmek isleýär.
Şertnamany Global Networks bölümçesi kompaniýanyň düzüminden bölünip aýrylandan soň, 12-18 aýyň içinde tamamlamak meýilleşdirilýär. Morgan Stanley analitikleri şeýle uly intellektual eýeçilige elýeterli bolmagyň durnukly girdeji akymyny üpjün etjekdigini belleýär.
Şertnama Ýewropa Bileleşiginiň we Birleşen Ştatlaryň çäginde monopoliýa garşy uly barlagdan geçmeli bolar. Düzgünleşdirijiler bu birleşigi Netflix-iň mediakontentiň döredilmegine we ýaýradylmagyna gözegçiliginiň güýçlenmegi hökmünde kabul edip biler.
Mundan başga-da, Golliwud aktýorlarynyň topary satyn almaga ýol bermezlik çagyryşy bilen Kongrese hat iberdi. Hatyň awtorlary Netflix-iň täsiriniň artmagynyň kinoteatr relizleriniň azalmagyna we filmleriň kinoteatrlarda görkezilýän ýa-da beýleki platformalara satylýan döwürlerinde girdejileriň azalmagyna getirip biljekdigini nygtaýar.
