Spotify akym hyzmaty ýylyň jemini jemläp, 2025-nji ýylyň iň meşhur artistlerini, şeýle-de iň köp diňlenen aýdymlary we albomlary kesgitledi.
Maglumatlara görä, dördünji gezek (2020, 2021 we 2022-nji ýyllardan soň) iň meşhur artist puertorikoly Bad Bunny boldy. Onuň aýdymlary platformada 19,8 mlrd gezek diňlendi. Şeýle-de, öňdebaryjylaryň bäşligine Teýlor Swift (dünýäde ikinji orny, ýöne ABŞ-da birinji orny eýeleýär), The Weeknd, Dreýk we Billi Aýliş girdi.
Iň köp diňlenen aýdymlaryň reýtinginde birinji orny 1,7 mlrd gezek diňlenen Ledi Gaga bilen Bruno Marsyň «Die With a Smile» aýdymy eýeledi. Ikinji orunda 2024-nji ýyldaky üçünji orundan ýokary galan Billi Aýlişiň «Birds of a Feather» aýdymy ýerleşdi. Öňdebaryjylaryň üçlügini Blackpink-den Roze bilen Bruno Marsyň «Apt» aýdymy jemledi. Ýylyň iň meşhur aýdymlarynyň bäşligine Aleks Uorreniň «Ordinary» we Bad Bunny-nyň «DtMF» aýdymlary hem girdi.
Albomlaryň arasynda Bad Bunny-nyň «Debí Tirar Más Fotos» albomy öňde barýar. Ikinji orny Netflix-iň «Keý-pop melgun awçylary» filminiň saundtreki eýeleýär. Ilkinji bäşlige yzygider ikinji ýyl Billi Aýlişiň «Hit Me Hard and Soft» (üçünji orun) we Sabrina Karpenteriň «Short n’ Sweet» (bäşinji orun) albomlary girdi. Dördünji orunda «SOS Deluxe: Lana» – SZA-nyň ikinji studiýa albomynyň gaýtadan çykarylan nusgasy ýerleşýär.
