Dekabr, adatça, uly platformalaryň, medialaryň we hatda sözlükleriň ýylyň jemini jemleýän wagtydyr. Wikipedia iň köp girilen sahypalary, Spotify esasy aýdymy, Kembrij we Oksford sözlükleri bolsa ýylyň sözüni kesgitleýän wagty, Google gözleg kompaniýasy hem 2025-nji ýylda iň meşhur gözleg soraglarynyň sanawyny hödürledi.
Bellemeli ýeri, bu ýönekeý bir meşhur sözler (meselem, «howa») däl-de, 2024-nji ýyl bilen deňeşdirilende gyzyklanma has-da artan mowzuklardyr.
Geçip barýan ýylda öňdebaryjy orunlary emeli aň eýeledi. Umumy reýtingde birinji orny Google-yň öz Gemini çat-boty eýeleýär. Onuň yzyndan kriketde iň möhüm we ýygy-ýygydan bolýan duşuşyklaryň biri – «Hindistan Angliýa garşy» sport soragy gelýär.
Ýeri gelende bellesek, ilkinji onluga ýene bir EA – ýedinji orny eýelän DeepSeek hytaý modeli girdi.
Habarlaryň arasynda Çarli Kirkiň ölümi, Eýrandaky wakalar we ABŞ-nyň hökümetiniň işiniň togtadylmagy (şatdaun) uly gyzyklanma döretdi. Şahsyýetleriň arasynda ilkinji üçlüge aýdymçy D4vd, repçi Kendrik Lamar we alypbaryjy Jimmi Kimmel girdi.
Sport barada aýdylanda, ulanyjylar, esasan, FIFA-nyň Klublaýyn dünýä çempionaty, şeýle-de kriket ýaryşlary – Aziýanyň Kubogy we ICC çempionlarynyň Kubogy bilen köp gyzyklandy. Toparlaryň arasynda «Pari Sen-Žermen», «Benfika» futbol klublary we «Toronto Blýu Jeýs» beýsbol topary öňde barýar. Iň meşhur türgen boksçy Terens Krouford boldy.
Kino kategoriýasynda «Anora», «Supermen» we «Minecraft kinoda» filmleri uly gyzyklanma döretdi. Iň meşhur aktrisa «Anoradan» Maýki Medison boldy, onuň yzyndan Lýuis Pullman («Gök gürrüldedijiler*») we Izabela Mersed («Supermen») gelýär. Serial kategoriýasynda «Kalmar oýnundan» we «Ýetginjeklik döwründen» öňe geçen «Nägehanlar: Ed Giniň hekaýaty» öňde barýar.
Aşhana ugrundan iň meşhur soraglaryň sanawynda birinji orny ýiti-süýji sous Hot Honey eýeledi. Onuň yzyndan «Maňa durmuşa çyk» (Marry Me Chicken) towugynyň we çimiçurri sousynyň resepti ýerleşdi.
Kitaplaryň arasynda iň köp gözlenenler Kolin Guweriň «Saňa gynanýaryn», Rebekka Ýarrosyň «Oniks tupany» we Nawessa Alleniň «Yşyk sönende» romanlary boldy. Kompýuter oýunlary kategoriýasynda öňdebaryjylar Arc Raiders, Battlefield 6 we Strands boldy.
2025-nji ýyl üçin doly hasabat bilen Google-yň resmi saýtynda tanşyp bilersiňiz.
