YouTube öz taryhynda ilkinji gezek şahsylaşdyrylan ýyllyk hasabaty döretdi. Ol ulanyjynyň bir ýylyň dowamynda tomaşa eden wideolaryny görkezýär.
Ozal YouTube Music-de Recap aýdym-saz statistikasy bardy, indi bolsa kontentiň ähli görnüşleri üçin umumy YouTube Recap peýda boldy.
Hasabatda her bir kesgitli tomaşaçy üçin ýylyň jemini görkezýän 12 töweregi şahsylaşdyrylan kartoçka bar.
YouTube Recap-da ýylyň jemi boýunça halanýan kanallary, meşhur mowzuklary, tomaşa etmek endiginiň üýtgändigi barada maglumatlary, şeýle-de ulanyjynyň bellibir «şahsyýet görnüşini» görüp bolýar. Meselem, platformany okuw üçin ýygy-ýygydan ulanýanlar «Skill Builder», oňyn kontent gözleýänler «Sunshiner» bolýar.
Şeýle-de, «Trailblazer», «Wonder Seeker», «Connector» we «Dreamer» ýaly şahsyýet görnüşleri bar.
Ulanyjylara ýylyň öňdebaryjy aýdymçylary we aýdymlary hem elýeterlidir; has giňişleýin aýdym-saz seljermesi bolsa YouTube Music programmasynda hödürlenýär.
YouTube hasabaty döretmezden ozal 50-den gowrak synag geçirendigini, pikiriň bolsa ulanyjylar tarapyndan hödürlenendigini aýtdy. Recap 2-nji dekabrda Demirgazyk Amerikadaky ulanyjylaryň arasynda ýaýrap başlady we bir hepdäniň içinde bütin dünýäde elýeterli bolar. Ony baş sahypada ýa-da mobil goşundysynda we desktopda “Siz” bölüminde görüp bolýar.
Munuň bilen birlikde YouTube ýyllyk reýtingini hödürledi: yzygider altynjy ýyl platformanyň öňdebaryjy kreatory MrBeast, iň meşhur podkast bolsa The Joe Rogan Experience boldy. Ýylyň aýdymy hökmünde Bruno Mars bilen Ledi Gaganyň «Die with a Smile» aýdymy saýlandy.
