“Red Bulluň” niderlandly sürüjisi Maks Werstappen “Formula-1-iň” Kataryň Gran-prisi tapgyrynyň ýeňijisi boldy we yzygider bäşinji gezek dünýä çempiony titulyny gazanmak mümkinçiligini saklady.
Werstappen häzirki möwsümde ýedinji Gran-prisini utdy. Ýaryşda ikinji bolup pellehana “Maklareniň” awstraliýaly sürüjisi Oskar Piastri geldi. Üçlügi “Uilýamsdan” ispaniýaly Karlos Saýns jemledi. Şahsy sanawda öňde barýan “Maklarenden” britaniýaly Lando Norris dördünji orny eýeledi. Ýaryşy bäşinji orunda “Mersedesiň” sürüjisi Andrea Kimi Antonelli tamamlady.
Ýaryşyň netijesi boýunça, Werstappen 2025-nji ýylyň çempionatynyň soňky tapgyryndan öň “Formula-1-iň” şahsy sanawynda Oskar Piastriden öňe geçip, ikinji orny eýeledi. Onuň hasabynda 396 utuk, Piastride bolsa 392 utuk bar. Lando Norris 408 utuk bilen birinji orny eýelemegini dowam etdirýär. Sürüjileriň üçüsi-de çempion bolmak mümkinçiligini saklaýar.
Şeýle-de, Kataryň Gran-prisi Norris üçin karýerasynda 151-nji boldy. Ol şotlandiýaly Dewid Kultharddan öňe geçip, Gran-prilere gatnaşmak boýunça toparyň rekord eýesi boldy.
Konstruktorlaryň kubogynda möhletinden ir ýeňiş gazanan “Maklareniň” hasabynda 800 utuk bar. Onuň yzyndan ilkinji bäşlikde “Mersedes” (459), “Red Bull” (426), “Ferrari” (382) we “Uilýams” (137) gelýär.
2025-nji ýylyň “Formula-1” çempionatynyň jemleýji, 24-nji tapgyry 5 – 7-nji dekabrda Abu-Dabide geçiriler.
