BMW kompaniýasy Z4 rodsteriň hoşlaşyk - Final Edition atly wersiýasynyň çykarylandygyny yglan etdi. Modeliň Awstriýada Magna Steyr zawodyndaky önümçiligi 2026-njy ýylyň aprelinde tamamlanar. Onuň bilen birlikde Z4-iň "ekiztaýy" bolan Toyota GR Supra hem ýygnama hataryndan aýrylar, ýöne ýapon kompaniýasy sport awtoulagynyň ömrüniň soňlanandygyny has öňräk yglan edipdi.
BMW Z4 Final Edition-yň önümçiligi indiki ýylyň fewral aýyndan aprel aýyna çenli çäklendirilen nusgada çykar. Çykarylan ähli sportkarlar Individual Frozen Black Metallic reňkine boýalar, Shadowline bukjasyndan ýalpyldawuk-gara detallara eýe bolar we gyzyl tormoz supportlary bilen bezeler. Salonyndaky gara oturgyçlar Vernasca derisinden we alkantaradan örtük çekilen, howpsuzlyk kemerleri üç reňkli M bezegli, interýeri gyzyl tikinler bilen bezelen. Opsiýalaryň giň sanawyna, beýleki zatlar bilen birlikde, proýeksiýa displeýi we Harman Kardon ses ulgamy girýär.
Soňky rodster tehniki taýdan standart Z4 M40i bilen birmeňzeşdir. Kapotyň aşagynda 3,0 litrlik atmosferaly alty silindrli hereketlendirijisi 387 at güýjüne (500 Nm) eýe bolup, ol alty basgançakly mehaniki ýa-da sekiz basgançakly awtomatiki geçiriji bilen birleşdirilen. Onuň öň tarapynda 19 dýuýmlyk, yzky tarapynda bolsa 20 dýuýmlyk diskalar bar.
Z4 Final Edition-yň bahasy takmynan 79 000 dollara düşer, bu bolsa standart Z4 M40i-den 10 000 dollar gymmat. Modeliň häzirki nesli 2018-nji ýylda önümçilige başlapdy.
Toyota täze Supra çykarmagy meýilleşdirýändigini, ýöne onuň BMW bilen bilelikde işlenip düzülmejekdigini aýtdy. Şeýle-de bolsa, bawariýaly öndüriji geljekde Neue Klasse platformasyna esaslanýan täze sport awtoulagynyň peýda bolmagynyň mümkindigini tassyklady.
