Türkmenistanda «Mekdebe çenli terbiýäni guramak we dolandyrmak» atly täze okuw gollanmasy neşir edildi. Ol Seýitnazar Seýdi adyndaky türkmen döwlet mugallymçylyk institutynyň pedagogika kafedrasynyň uly mugallymy N.Myradowa hem-de pisihologiýa kafedrasynyň uly mugallymy S.Myradowa tarapyndan bilelikde taýýarlanyldy.
Okuw gollanmada milli bilim ulgamynyň ilkinji binýatlyk we möhüm basgançaklarynyň biri bolup durýan çagalar mekdebe çenli bilim edaralarynda geçirilýän okuw-terbiýeçilik işleri hakynda mazmunly materiallar we zerur maglumatlar getirilipdir.
Gollanmanyň sahypalarynda mekdebe çenli bilim edaralarynyň wekilleriniň – çagalar baglarynyň müdirleriniň, usulyýetçileriniň, terbiýeçileriniň hem-de beýleki hünärmenleriniň iş ugurlary we wezipeleri giňişleýin beýan edilýär. Şeýle hem gollanmada resminamalaryň gerekli derejede alnyp barylmagy, mugallymlaryň geňeşiniň işiniň guralmagy, usulyýet otaglarynda mugallymlar bilen geçirilýän iş ugurlary barada maglumatlar berilýär.
Täze neşir mekdebe çenli ýaşdaky çagalaryň terbiýesi, okuwy we ösüşi hem-de olary mekdep bilimine taýýarlamak bilen meşgullanýan çagalar baglarynyň hünärmenleri üçin gymmatly gollanma bolup hyzmat eder.
Şeýle hem mekdebe çenli bilim berýän mugallymlara niýetlenen okuw gollanmasy bu hünär boýunça bilim alýan ýokary we orta hünär okuw mekdepleriniň talyplary üçin peýdaly bolar.
