Microsoft kompaniýasy Xbox 360-yň 20 ýyllygy mynasybetli ýönekeý we ýeňil plastik aýakgaplaryň – krokslaryň çäkli sanyny çykardy. Olar konsolyň özboluşly reňklerini öz içine alýar we kontrollýoryň düwmelerine we joýstiklerine meňzeş elementler bilen bezelen. Satuwlar 25-nji noýabrda başlady diýip, The Verge gazeti ýazýar.
Ozal, oktýabr aýynda Microsoft ilkinji gezek Crocs bilen hyzmatdaşlyk edip, Windows XP stilindäki Krokslary çykardy. Olar satuwa çykarylmasa-da, köpçülikde uly gyzyklanma döretdi. Görnüşi ýaly, şunuň özi bu täze taslamany — Xbox 360 stilindäki krokslary synap görmek üçin ýeterlik boldy. Aýakgaplar çäkli möçberde satylar.
Mundan başga-da, meşhur oýunlaryň gahrymanlaryny we logotiplerini öz içine alýan podweskalary satyn alyp bolýar.
Aýakgaplaryň bahasy 80 dollar, oýnuň ýa-da gahrymanyň logotipi bolan her bir podweskanyň (Jibbitz-iň) bahasy bolsa 20 dollar. Krokslaryň esasy görnüşinde kontrollýoryň ähli dolandyryş elementleri bar we podweskalar üçin deşikler gaýyş bagynda ýerleşýär.
Kroks aýakgaplary takmynan 25 ýyl bäri bar. Ilki başda ýahtmenler we suw sporty üçin işlenip düzülen bu aýakgaplar lukmançylyk işgärleriniň arasynda hem geýmäge amatlylygy we dezinfeksiýa etmegiň aňsatlygy sebäpli meşhurlyk gazandy, bu bolsa COVID-19 pandemiýasy döwründe has-da peýdaly boldy. Krokslar 2006-njy ýylda geljekde diňe şu aýakgaplary geýýän adamlary suratlandyrýan utopiýa garşy gülküli film "Idiokratiýanyň" täsiri bilen giňden meşhurlyk gazandy.
