Astana şäherinde Türkmenistanyň aragatnaşyk ministri Hajymyrat Hudaýgulyýew bilen Gazagystanyň Premýer-ministriniň orunbasary – emeli aň we sanly ösüş ministri Žaslan Madiýewiň arasynda gepleşikler geçirildi. Duşuşyk Türkmenistanyň Prezidentiniň Gazagystana döwlet saparynyň çäklerinde boldy.
Gepleşikleriň dowamynda taraplar kabel serhet geçelgesini gurmak we iki ýurduň magistral telekommunikasiýa ulgamlaryny göni birleşdirmek barada ylalaşdylar. «Türkmentelekom» bilen gazagystanly «TNS-Plus» JÇJ arasynda Niýetler hakyndaky Ähtnama gol çekildi.
Resminamada Temirbaba (Gazagystan) — Bekdaş (Türkmenistan) böleginde ýerasty optiki-süýümli aragatnaşyk ulgamyny gurmak meýilnamalary berkidilýär. Magistral ulgamlaryň göni birleşdirilmegi sebitiň üstaşyr kuwwatyny güýçlendirmeli, halkara kanallaryň geçirijilik ukybyny artdyrmaly we Merkezi Aziýada täze, has netijeli sanly maglumat geçiriş ugurlaryny döretmeli.
Taslamany durmuşa geçirmek üçin tehniki ölçegler we resminamalary taýýarlamak bilen meşgullanýan bilelikdäki iş topary dörediler. DWDM tehnologiýalaryny ulanmak bilen esasy gurluşyk işlerini Ähtnama gol çekilen pursadyndan 12 aýyň dowamynda tamamlamak meýilleşdirilýär.
Duşuşykda infrastruktura böleginden başga-da, sanly hyzmatdaşlygyň beýleki ugurlary hem ara alnyp maslahatlaşyldy. Taraplar emeli aňyň ösüşine, elektron hökümeti kämilleşdirmäge, «Kazpoçta» (Gazak poçtasy) JSS-niň mehanizmleri arkaly sanly söwdanyň mümkinçiliklerini giňeltmäge, şeýle hem kosmos tehnologiýalary we aragatnaşyk ulgamyndaky hyzmatdaşlyk boýunça yzygiderli işleri dowam etdirmäge degip geçdiler.
Türkmenistan Gazagystanyň Almatydaky ESKATO-nyň (Aziýa we Ýuwaş Umman üçin Ykdysady we Durmuş Komissiýasy) goldawy bilen Durnukly ösüş üçin Sebit sanly çözgütler merkezini döretmek ideýasyny goldady. Başlanan işiň degişli edaralaryň syýasy goldawyny alandygy we Ykdysady hyzmatdaşlyk boýunça Hökümetara toparyň teswirnamasynda öz beýanyny tapandygy bellenildi.
