Dünýäniň dört gezek çempiony, “Red Bull” toparynyň sürüjisi Maks Werstappen “Formula-1” çempionatynyň Las-Wegasyň Gran-prisi tapgyrynyň ýeňijisi boldy. Bu ýeňiş onuň üçin karýerasynda 69-njy we häzirki möwsümde altynjy boldy.
Werstappen ýaryşa ikinji orundan başlady, ýöne birinji öwrümde Lando Norris (“Maklaren”) ýalňyşlyk goýberip, daşyna çykandan soň derrew öňdebaryjy boldy. Şol pursat Norris Jorj Rasselliň (“Mersedes”) hem öňe geçmegine ýol berdi, ýöne birnäçe pit-stopdan soň öz ornuny dikeltdi.
Şeýlelikde, Norris pellehana ikinji bolup geldi, üçünji Rassell boldy. Oskar Piastri (“Maklaren”) ýaryşy dördünji orunda tamamlady. Şowsuz kwalifikasiýa sebäpli ýaryşa soňky orundan başlan ýedi gezek dünýä çempiony, britaniýaly Lýuis Hemilton (“Ferrari”) onunjy orna çykdy.
Ýaryşdan soň Norris bilen Piastriniň awtomobilleriniň tehniki düzgünlere laýyk gelmeýändigi belli boldy. Şol sebäpli “Maklareniň” iki sürüjisi-de diskwalifikasiýa edildi. Tehniki barlag olaryň awtoulaglarynyň aşaky bölegindäki ýörite plankanyň bellenilen iň az görkezijiden – 9 mm-den inçedigini görkezdi.
Şondan soň ýaryşyň netijesi üýtgedi: Jorj Rassell ikinji orna çykdy, Kimi Antonelli üçünji, Şarl Lekler dördünji, Karlos Saýns bäşinji boldy.
Umumy sanawda Lando Norris 390 utuk bilen öňdebaryjylygy saklady. Oskar Piastri bilen Maks Werstappen indi 366 utuk bilen ikinji we üçünji orunlary paýlaşýar. “Maklaren” ozal Konstruktorlaryň kubogynda möhletinden ir ýeňiş gazanypdy.
Möwsümiň tamamlanmagyna iki tapgyr galdy, indiki ýaryş 30-njy noýabrda Katarda geçiriler.
