Futbol boýunça dünýä çempionatynyň başlanmagyna sanlyja günler galdy. Şonuň üçin şu günler esasan futbol, şeýle-de biletleriň gymmatlygy, FIFA-nyň töweregindäki düşnüksiz jedeller we dürli guramalaryň aladalary hakynda gürrüňler köp edilýär.
Euronews Culture bolsa şeýle gyzgalaňly günlerde ünsi has ýeňil we gyzykly mowzuga – futbol modasyna gönükdirmegi teklip edýär. Saýt çempionata gatnaşjak 48 toparyň lybaslaryny öwrenip, olaryň içinden iň göze gelüwlilerini we gelşiksizlerini saýlady.
Iň gowy futbol lybaslary
1. Argentina — Myhmançylykdaky lybasy
Turniriň iň özboluşly dizaýnlarynyň biri. Gara reňkli köýnekçäniň ýüzi Buenos-Aýresiň adaty çeperçilik stili bolan «fileteado» sungatyndan nusga alnyp çekilen gök ösümlik nagyşlary bilen bezelipdir. Bu dizaýn toparyň milli aýratynlygyny açmak bilen birlikde, lybasy beýlekilerden tapawutly görkezýär.
2. Gana — Öý lybasy
Bu lybas Günbatar Afrika folklorynyň gahrymany – paýhas bilen mekirligiň nyşany bolan Anansi atly şahsyýetiň keşbinden ylham alnyp taýýarlanypdyr. Eşigiň merkezindäki esasy Gara ýyldyz we ondan ýaýraýan çyzyklar möýüň kerebini ýatladýar. Dizaýn adaty milli ähenler bilen häzirki zaman modasyny örän oňat utgaşdyrýar.
3. Fransiýa — Öý lybasy
Fransuzlar ýene-de meýdançada beýlekilerden görnükli görünjege meňzeýär. Olaryň adaty gök reňki bu gezek zig-zag nagyşlar, ak ýaka we bürünç öwüşginli elementler bilen baýlaşdyrylypdyr. Netijede, lybas ýönekeý ýaly görünse-de, gözüňi egläýjek bezegleri özünde saklaýar.
4. Meksika — Öý lybasy
Turniriň iň täsirli we ýagty dizaýnlarynyň biri. Lybasyň esasyny astekleriň taryhy senenamasynyň («Piedra del Sol» – «Gün daşy») bölekleri düzýär. Ondaky nagyşlar çylşyrymly we owadan, nusgawy reňkler bolsa örän ýerlikli ulanylypdyr.
Iň gelşiksiz futbol lybaslary
ABŞ — Öý lybasy:
2022-nji ýyldaky çym-ak eşik bilen deňeşdireniňde bu görnüş has gelşikli görünýär. Ýöne şeýle-de bolsa, gyzyl-ak çyzyklar göz-görtele milli baýdagy ýatladýar. Has dogrusy, «ýyldyzly» myhmançylyk lybasy bilen bile goýup seredeniňde, bu dizaýn örän elujy we «menden saňa barynça» ýaly çemeleşilene meňzeýär.
Şwesiýa — Myhmançylyk lybasy:
Adaty öý lybasyna garanyňda has batyrgaý dizaýn, ýöne tolkunly nagyşlar sorag döredýär. Synçylaryň pikiriçe, bu nagyşlar lybasy bezemegiň deregine, gaýta ünsi başga tarapa sowýar.
Angliýa — Öý lybasy:
Bu lybasda 1990-njy ýyllaryň «Umbro» modellerinden nusga alnypdyr we şol sebäpli-de diýseň köneçil bolup çykypdyr. Esasy kemçilik — ýiti, täzeçil çözgütleriň we ýatda galyjy jhiç bir zadyň ýoklugydyr.
Braziliýa — Myhmançylyk lybasy:
Eşikde gerbiň üýtgeşik ýerleşdirilişi, sary jähek we Jordan brendi bilen hyzmatdaşlyk ýaly gyzykly elementler bar. Ýöne Amazonka tokaýlyklarynyň agaç gurbagalarynyň reňkinde çekilen garamtyl grafiki şekiller meýdançada isleýşiň ýaly owadan görünmeýär.
Germaniýa — Myhmançylyk lybasy:
Nemes ýygyndysynyň 2027-nji ýylda Nike-a geçmezinden öň Adidas tarapyndan taýýarlanan iň soňky ýörite eşigi garaşylýan netijäni bermedi. Lybasyň ýüzündäki romb şekilli nagyşlar gaty dykyz we agyr görünýär, dizaýn bolsa köp ýyllyk hyzmatdaşlygyň soňuna laýyk täsiri galdyrmaýar.
Dünýä çempionaty 11-nji iýun – 19-njy iýul aralygynda ABŞ-nyň, Kanadanyň we Meksikanyň meýdançalarynda geçiriler.
