Soňky sekiz ýylyň dowamynda dünýäde ýalňyz adamlaryň sany azyndan 100 million artdy. Bu maglumaty The Economist žurnaly getirýär we bu ýagdaýyň ösen ýurtlaryň aglabasy üçin häsiýetlidigini belleýär.
Iň ösen 30 ýurduň seljermesi olaryň 26-synda 2010-njy ýyldan bäri ýanýoldaşsyz ýaşaýan adamlaryň paýynyň artandygyny görkezdi.
ABŞ-da 25-34 ýaş aralygyndaky ýalňyz raýatlaryň sany soňky 50 ýylyň dowamynda iki esse artdy. Häzirki wagtda erkekleriň 50%-i we zenanlaryň 41%-i ýanýoldaşsyz ýaşaýar.
Neşir bu ýagdaýy zenanlaryň ykdysady garaşsyzlygynyň artmagy we nikalaşmak babatda jemgyýetçilik basyşynyň azalmagy bilen baglanyşdyrýar. «Adaty gatnaşyklar ýekelikde ýaşamakdan az özüne çekiji bolup görünýär» - diýip, neşir ýazýar.
Şol bir wagtyň özünde, pes girdejili erkekler üçin ýanýoldaş tapmak has kynlaşýar, bu bolsa statistika hem täsirini ýetirýär.
Sosial torlar hem aýratyn faktor hökmünde görkezilýär. Ol gatnaşyklardan aşa ýokary garaşmak duýgusyny döredýär we duşuşyklar bilen baglanyşykly howsalalary artdyrýar. Tehnologiýanyň ösüşi hem ýagdaýa täsir edip başlady: ýeke ýaşaýan adamlaryň bir bölegi emeli aň ýoldaşlary bilen gatnaşygy has gowy görýärler.
