Milliarder Jeff Bezos emeli aň ulgamynda «Project Prometheus» atly başlangyjyny işe girizdi. The New York Times gazetiniň habaryna görä, kompaniýa eýýäm 6,2 milliard dollar maýa goýumyny toplady we bu ony irki tapgyrdaky maliýeleşdirme boýunça dünýäde öňdebaryjy başlangyçlaryň birine öwürdi.
Taslama emeli aňyň aerokosmos, awtoulag we kompýuter senagatynda ulanylmagyna gönükdiriler. Bezos kompaniýanyň iki baş direktorynyň biri boldy, bu onuň 2021-nji ýylda Amazon-dan aýrylandan bäri ilkinji ýolbaşçy wezipesi. Beýleki baş direktor fizik we himik Wik Bajajdyr, ol ozal Google-yň X laboratoriýasynyň (akylly kontakt linzalary, Wing drony bilen eltip berme ulgamy we beýleki ideýalary işläp düzýän gizlin bölüm) işgäri bolup işlän.
NYT kompaniýanyň takyk işe giriziljek senesiniň we ýerleşýän ýeriniň belli däldigini belleýär. Şeýle-de bolsa, «Project Prometheus» eýýäm takmynan 100 işgäri işe aldy. Neşiriň çeşmeleri olaryň arasynda OpenAI-yň, DeepMind-yň we Meta-nyň hünärmenleriniň bardygyny tassyklaýarlar.
2021-nji ýyldan soň Bezos öz aerokosmos kompaniýasy bolan Blue Origin-e has işjeň gatnaşdy we emeli aň bilen gyzyklanmasyny artdyrdy. 2024-nji ýylyň noýabr aýynda ol robototehnika üçin esasy programma üpjünçiligini işläp düzýän Physical Intelligence atly başlangyja maýa goýdy.
NYT bilen söhbetdeşlikde Bezos emeli aň bilen baglanyşykly häzirki gyzyklanmany ýitgilere getirip biljek, ýöne şol bir wagtyň özünde geljekde uly peýda getirip biljek “senagat köpügi” bilen deňeşdirdi. Onuň sözlerine görä: «Tozan ýatyşanda, kimiň utuşdadygyny göreris; jemgyýetler bu oýlap tapyşlardan peýda görer».
