Aşgabatda “Best Startup Project” bäsleşiginiň ýarym final tapgyry üstünlikli geçirildi. “Startup Academy Ambassodor” guramasynyň guramagynda ýokary guramaçylyk derejesinde geçirilen bäsleşik ýaşlaryň innowasion ukyplaryny ösdürmegi maksat edinýär. Bu barada Türkmenistanyň Bilim ministrliginiň Innowasiýa maglumat merkezi habar berýär.
Ýarym finalyň halkara tapgyrynda Türkmenistandan birnäçe taslamalar gatnaşdy. Olar ýurduň ýaşlarynyň tehnologiýa we innowasiýa pudagyndaky ýokary mümkinçiliklerini görkezýär. Ýarym finalda çykyş eden taslamalaryň arasynda Türkmenistanyň adyndan halkara tapgyryna saýlanylan iki taslama aýratyn bellendi:
- "Bezen Fasonlar" taslamasy — bu, Türkmen milli fasonlaryny we tikinçilik sungatyny sanly giňişlige geçirmäge gönükdirilen, innowasion mobil programma üpjünçiligidir. Ol adamlara milli lybaslaryň iň owadan, täze we asyl nusgalaryny aňsatlyk bilen tapmaga, saýlamaga we tikdirmäge kömek etmek üçin döredilýär.
- Türkmenistanyň bilim ministrliginiň innowasiýa maglumat merkezi “E-mekdep” ulgamy: Bilim beriş ulgamyny häzirki zaman talaplaryna laýyklykda sanlylaşdyrmak we okuw prosesini kämilleşdirmek üçin niýetlenen taslama.
Türkmenistanyň Bilim ministrliginiň Innowasiýa maglumat merkezi tarapyndan döredilen "E-mekdep" ulgamy hut şu beýik maksatlara hyzmat edýän, geljege gönükdirilen esasy taslamadyr. Bu diňe bir tehniki innowasiýa däl, eýsem, tutuş bilim beriş prosesini täze derejelere göterýän sanly köpri bolup durýar.
"E-Mekdep" okuw işini kämilleşdirmegi - mugallymlar we okuwçylar üçin netijeli gurallary hödürlemek bilen, sapaklaryň hilini we täsirliligini artdyrmagy maksat edinýär.
