Türkmenistanda Seýitnazar Seýdi adyndaky Türkmen döwlet mugallymçylyk institutynyň mugallymlary tarapyndan ýokary okuw mekdepler we orta mekdepler üçin taýýarlanylan okuw gollanmalary neşir edildi.
Informatikany okatmagyň usulyýeti kafedrasynyň mugallymlary M.Berenow hem-de A.Taňryberdiýewa ýokary okuw mekdeplerinde talyplaryň «Algoritmleşdirmegiň we programma düzmegiň esaslary» dersini netijeli öwrenmeklerini ýokarlandyrmaga gönükdirilen «Barlaghana okuwlarynda С++» atly täze okuw gollanmasynyň awtorlary boldular. Gollanmada temalara laýyklykda barlaghana işleriniň beýany hem-de çözgütleriň nusgalary yzygiderli getirilýär.
«Amaly okuwlarda С++» atly okuw gollanmasy hem ýokarda agzalan kafedranyň mugallymlary M.Berenow we D.Muhanow tarapyndan taýýarlanyldy. Bu gollanmada ýönekeýden çylşyrymla tarap tertipleşdirilen temalar boýunça meseleler hem-de olaryň çözülişi berilýär. Gollanmanyň ahyrynda özbaşdak iş üçin ýumuşlar hödürlenilýär.
Şeýle hem dosent M.Berenow «С++ dilinde programma düzmek» atly okuw gollanmanyň awtorydyr. Onda umumy sapaklar görnüşinde «С++» dilinde programma ýazmagyň esaslary beýan edilýär. Her temanyň soňunda anyk mysallar arkaly meseleleri çözmegiň usullary görkezilýär.
Informatikany okatmagyň usulyýeti kafedrasynyň hem-de okatmak usulyýetli zähmetiň we tehnologiýalaryň esaslary kafedrasynyň mugallymlary M.Berenow, A.Taňryberdiýewa hem-de M.Rähmedow «Informatika boýunça meseleleri çözmek» okuw gollanmasynyň awtorlarydyr. Onda ýumuşlar, olaryň çözülişi we özbaşdak iş üçin testler getirilýär. Çözülişinde programma ýazmagyň «PascalABC» dilinde düzülen programmalar hem-de geçilenleri berkitmek üçin barlag ýumuşlar beýan edilipdir. Bu okuw gollanmasy ýokary okuw mekdepleriň inžener-tehniki hünärleriniň talyplary üçin bolşy ýaly, orta mekdepleriň ýokary synp okuwçylaryna-da, okuw mekdepleriň ylmy işgärleri we ähli gyzyklanýan okyjylar üçin hem niýetlenendir.
«Sanlar dünýäsi» atly beýleki okuw gollanma okatmak usulyýetli zähmetiň we tehnologiýalaryň esaslary kafedrasynyň mugallymlary M.Rähmedow, O.Seýitgulyýewa hem-de O.Kulyýewa tarapyndan taýýarlanyldy. Gollanmada ilkinji sanlar we sanly aňlatmalar, hasaplamak sungatynyň kämilleşdirilişi we ösüşi, şeýle hem hasaplamalary ýerine ýetirmegiň algoritmi barada maglumatlar getirilýär. Kitap ýokary okuw mekdepleriň talyplaryna we mekdepleriň okuwçylaryna, matematika we informatika mugallymlaryna şeýle hem matematika we onuň taryhy bilen gyzyklanýan beýleki okyjylara niýetlenendir.
Mugallymçylyk institutynyň bütindünýä taryhyny okatmagyň usulyýeti kafedrasynyň uly mugallymy M.Agamyradowanyň hem-de Aşgabat şäherindäki 1-nji orta mekdebiň mugallymy J.Kullaýewanyň bilelikdäki tagallalary netijesinde ýokary okuw mekdepleriň taryhçy talyplaryna we mugallymlaryna niýetlenilen «Kömekçi taryhy dersler» atly kitap taýýarlanyldy. Kitapda paleografiýa, metrologiýa, hronologiýa, numizmatika, sfragistika, geraldika, genealogiýa, onomastika, etnonimika, antroponimika, toponimika ýaly kömekçi taryhy ylymlar barada, şeýle hem olary öwrenmegiň obýektleri, seljeriş usullary hem-de olaryň beýleki ylymlar bilen arabaglanyşygy barada gymmatly maglumatlar getirilýär.
«Sözleýişiň medeniýeti boýunça amaly meseleler» atly ýene-de bir täze okuw gollanma türkmen dilini okatmagyň usulyýeti kafedrasynyň uly mugallymy M.Jumaýewa tarapyndan taýýarlanyldy hem-de ulanyjylar üçin elektron görnüşde neşir edildi. Gollanmada talyplara türkmen edebi diliniň orfoepiki, orfografiki, leksiki, grammatiki, stilistiki kadalaryny sanly görnüşde okuw geçmegiň häzirki zaman usullary beýan edilýär. Onda türkmen dilini okatmagyň usulyýetindäki ýörelgeler bilen bir hatarda medeniýet bilen arabaglanyşyk ýörelgesine hem aýratyn ähmiýet berlipdir. V-XII synplaryň okuwçylary bilen işlemäge niýetlenilen elektron okuw gollanmasy ýurduň umumy bilim berýän orta mekdepleriniň mugallymlary üçin gymmatly ugur görkeziji bolup hyzmat eder.
