Kia 2027-nji model ýylynyň üç hatarly Telluride ulagyny görkezdi. Ýolsuz ýerlerden hem hereket etmek üçin niýetlenen bu ulagyň ilkinji köpçülikleýin görkezilişi noýabryň ahyrynda Los-Anjelesdäki awtosalonda bolar. ABŞ-da satuw 2026-njy ýylyň başynda başlar diýip, Carscoops ýazýar.
Awtomobil öňküden has ulaldy: uzynlyk 58 mm, tigir bazasy 75 mm, beýiklik bolsa 25 mm artdy. Öndüriji ölçegleriň has sazlaşykly, dizaýnyň bolsa çyzyklar we giň tigir arkalary bilen has ýiti we “daýaw” bolandygyny belleýär.
Telluride dik yşyk diodly faralara we çyralara eýe boldy, radiator gözenegi hem doly täzeden işlendi. X-Pro wersiýada radiator gözenegine tirkeg halkalary goşuldy, ulag ýörite tekerlere eýe boldy. Awtomobiliň klirensi 231 mm.
Salon köp babatda EV9 elektrik krossoweriniň çözgütlerini gaýtalaýar. Merkezde 12,3 dýuýmlyk iki sany birleşdirilen displeý, döwrebap dört keýeli rul we hereket gutusynyň täze selektory bar. Kuzowyň ulaldylmagy üç hataryň ählisi üçin has giň ýeri üpjün etdi, salon bezegi has ýokary hilli we minimalistik boldy.
Kia häzirlikçe ähli tehniki maglumatlary bermeýär, ýöne 291 at güýjüni berýän köne V6 atmosfera hereketlendirijisiniň geçmişde galjakdygy belli. Onuň ornuna iki görnüş geler: 287 at güýjüni berýän 3,5 litrlik V6 we 2,5 litrlik turbomotora esaslanýan zarýad berilýän gibrid ulgamy. Täze Telluride-niň arassa elektrik görnüşi bolmaz.
