Adam başyna iň ýokary girdejisi bolan on ýurduň ýedisi Ýewropada ýerleşýär. Bu maglumat Halkara pul gaznasynyň (HPG) 2025-nji ýylyň oktýabrdaky ýagdaýyna görä täzelenen reýtinginde görkezilýär.
Sanawda absolýut lider Lihtenşteýn boldy. Bu ýurt Şweýsariýa bilen Awstriýanyň arasynda ýerleşýän kiçijik knýazlyk. Bu ýerde adam başyna düşýän jemi içerki önüm (JIÖ) 231 713 dollara ýetdi. Bu görkezijiniň şeýle ýokary bolmagy ýurduň ykdysadyýetiniň özüne mahsus aýratynlyklary bilen düşündirilýär: işgärleriň takmynan 60%-i her gün serhedi geçip işe gelýän daşary ýurtly ýaşaýjylar. Olaryň ilat statistikasynda görkezilmeýänligi sebäpli, bir adama düşýän ortaça girdeji has ýokary görünýär.
Ikinji orunda meňzeş modeli ulanýan Lýuksemburg ýerleşýär: daşary ýurtly işgärleriň köpdügi we öňdebaryjy maliýe sektory onuň ykdysadyýetini ösdürýär.
Ilkinji üçlügi 129 132 dollarlyk adambaşyna JIÖ bilen Irlandiýa jemleýär. Ýurduň ösüşi Google, Meta, Apple we Microsoft ýaly iri halkara kompaniýalarynyň Ýewropadaky ştab-kwartiralarynyň bu ýerde ýerleşmegi bilen baglanyşykly. Üns çekiji salgyt syýasaty we ýokary bilimi bolan işgärler Irlandiýany Ýewropanyň IT merkezi we "bilim ykdysadyýeti" boýunça ýurtlar üçin nusga etdi.
Onluga Şweýsariýa, Islandiýa we Singapur hem girdi. HPG bu döwletleriň ýokary hakyky girdejilere eýedigini, olaryň daşary işçi akymyna ýa-da salgyt ýeňilliklerine gönüden-göni bagly däldigini belleýär. Aýratynam, Singapuryň mysaly üns çekmäge mynasyp: 1980-nji ýyldan bäri adambaşyna düşýän ortaça girdeji 19 esse ösdi. Ol Londonyň we Nýu-Ýorkyň derejesinde maliýe, logistika we ýokary tehnologiýalar merkezine öwrüldi.
HPG-niň maglumatlaryna görä, girdeji boýunça öňde barýan ýurtlaryň aglabasy — jemgyýetçilik ulgamy kämil, bilim we innowasiýalara ýokary maýa goýýan we durnukly syýasy guramaçylyga eýe kiçi döwletlerdir. Meselem, 2025-nji ýylda dünýä boýunça ortaça adambaşyna düşýän JIÖ 15 000 dollar boldy. Ykdysadyýetçiler şeýle uly tapawutlaryň diňe ykdysadyýetiň möçberini däl, eýsem dolandyryşyň netijeliligini, tehnologiýalaryň derejesini we sosial syýasaty hem görkezýändigini nygtaýarlar.
