13-nji noýabrda Türkmenistanyň Söwda-senagat edarasynda «Türkmentel — 2025» atly XVIII halkara serginiň we ylmy maslahatyň, şeýle-de «Halkara ulag-üstaşyr geçelgeleri: özara arabaglanyşyk we ösüş — 2025» atly halkara maslahatyň we serginiň çäklerinde köp sanly ikitaraplaýyn duşuşyklar geçirildi.
Duşuşyklaryň netijesi boýunça birnäçe möhüm ikitaraplaýyn resminamalara gol çekildi, sebit üçin möhüm ugurlarda – telekommunikasiýa, üstaşyr geçirmek we kiberhowpsuzlyk boýunça möhüm ylalaşyklar baglaşyldy.
Hususan-da,
- “Türkmentelekom” EAK-sy bilen “Gyrgyztelekom” açyk görnüşli paýdarlar jemgyýetiniň arasynda hyzmatdaşlyk boýunça meýiller hakynda Ähtnama gol çekildi. Bu resminama telekommunikasiýa akymlarynyň üstaşyr geçirilmegi guramaga gönükdirilendir. Bu bolsa Merkezi Aziýanyň sanly geçelge hökmündäki ornuny gönüden-göni güýçlendirýär.
- Türkmenistanyň Aragatnaşyk ministrligi maglumat howpsuzlygy we bulut çözgütleri ulgamynda dünýäniň öňdebaryjylarynyň biri bolan “Palo Alto Networks, Inc.” amerikan kompaniýasy bilen özara düşünişmek baradaky Ähtnama gol çekdi.
- Fransiýanyň “THALES DIS France SAS” kompaniýasy bilen özara düşünişmek baradaky Ähtnama gol çekildi.
- Türkmenistanyň Aragatnaşyk ministrligi şeýle hem Estoniýanyň Elektron dolandyryş akademiýasy (“E-Governance Academy”) bilen özara düşünişmek baradaky Ähtnama gol çekdi. Bu resminama sanly hökümet hyzmatlaryny ösdürmek we ornaşdyrmak pudagynda öňdebaryjy tejribeleri we bilermenler biliminiň alyş-çalşyny üpjün etmäge gönükdirilendir.
- Türkmenistanyň Demir ýol ulaglary ministrligi bilen Hytaýyň “China CAMC Engineering Co., Ltd.” inženerçilik korporasiýasynyň arasynda özara düşünişmek baradaky Ähtnama gol çekildi. Bu ylalaşyk ýurduň demir ýol infrastrukturasyny döwrebaplaşdyrmak we ösdürmek boýunça bilelikdäki taslamalara ýol açýar.
