Türkmenistanyň daşary işler ministriniň orunbasary Mähri Bäşimowa Halkara Gyzyl Haç Komitetiniň (HGHK) Merkezi Aziýa boýunça Sebitleýin wekilhanasynyň ýolbaşçysynyň orunbasary hanym Jamilýa Hammami bilen duşuşdy. Bu barada Türkmenistanyň DIM-nd habar berdiler.
Duşuşygyň barşynda M.Bäşimowa söhbetdeşini täze wezipä bellenilmegi bilen gutlap, onuň jogapkärçilikli işinde üstünlikleri arzuw etdi.
Türkmenistan bilen Halkara Gyzyl Haç Komitetiniň arasyndaky hyzmatdaşlygyň netijeli häsiýetini bellemek bilen, taraplar Türkmenistanyň Hökümeti bilen HGHK-niň arasyndaky hyzmatdaşlygyň 2025-nji ýyl üçin Meýilnamasynyň durmuşa geçirilişi boýunça pikir alyşdylar. Agzalan resminama boýunça göz öňünde tutulan çäreler, şol sanda halkara ynsanperwerlik hukugyny ilerletmäge, ilatyň aýratyn kömege mätäç toparlaryna goldaw bermäge hem-de Türkmenistanyň Gyzyl Ýarymaý Milli jemgyýetiniň işini berkitmäge gönükdirilen maksatnamalar ara alnyp maslahatlaşyldy.
Türkmenistanyň halkara ynsanperwerlik hukugyna syýasy ygrarlylygyny güýçlendirmäge gönükdirilen Bütindünýä başlangyjyna goşulmagynyň mümkinçilikleri bilen bagly meselä hem aýratyn üns berildi.
Duşuşykda Türkmenistan tarapyndan adatdan daşary ýagdaýlaryň netijelerinden zyýan çeken döwletlere yzygiderli ynsanperwer kömeginiň berilýändigi hem nygtaldy. Şunuň bilen baglylykda, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýardamy bilen şeýle ýurtlaryň ilatyna, şol sanda goňşy Owganystana yzygider berilýän ynsanperwer kömegi aýratyn bellenildi.
Taraplar Halkara Gyzyl Haç Komitetiniň wekiliýetiniň Halkara parahatçylyk we ynanyşmak ýylyna, Halkara Bitaraplyk gününe hem-de Türkmenistanyň hemişelik Bitaraplygynyň 30 ýyllygyna bagyşlanan çärelere gatnaşmagyny hem ara alyp maslahatlaşdylar.
