6–10-njy noýabr aralygynda Katowise şäherindäki (Polşa) Sileziýa uniwersitetinde geçirilen talyplaryň halkara toparlaýyn matematika olimpiadasynda ýurdumyzyň wekilleri jemi 22 medala mynasyp boldular diýip, “Türkmenistan: Altyn asyr" neşiri habar berýär.
Şahsy bäsleşiklerde türkmen talyplary 9 altyn, 8 kümüş we 2 bürünç medal gazandylar. Toparlaýyn bäsleşikleriň netijesinde bolsa bu sanawa goşmaça 2 kümüş we 1 bürünç medal goşuldy. Mundan başga-da, ýurdumyzyň wekilleri iki höweslendiriji baýrak bilen sylaglanyldy.
Olimpiada Polşanyň, Beýik Britaniýanyň, Ispaniýanyň, Italiýanyň, Awstriýanyň, Germaniýanyň, Fransiýanyň hem-de Türkmenistanyň öňdebaryjy ýokary okuw jaýlaryndan gelen 150-den gowrak gatnaşyjyny bir ýere jemledi.
Bäsleşige gatnaşyjylara matematikanyň esasy bölümleri boýunça çylşyrymly meseleler teklip edildi — matematiki analiz (topologiýa we toplumlaryň teoriýasy bilen birlikde), funksional we differensial deňlemeler, algebra we kombinatorika, geometriýa, çyzykly algebra hem-de ähtimallyklar teoriýasy boýunça.
