Manilada “Ýer hanymy – 2025” (Miss Earth) gözellik bäsleşigi geçirildi. Onuň ýeňijisi Çehiýadan Natali Puşkinowa boldy. Täji oňa geçen ýylky bäsleşigiň ýeňijisi, awstraliýaly Jessika Leýn geýdirdi.
Bu Çehiýanyň wekiliniň bäsleşikde ikinji gezek ýeňiş gazanmagy boldy – 2012-nji ýylda “Ýer hanymy” adyna Tereza Faýksowa mynasyp bolupdy.
Şeýle-de, “Ýer Howa hanymy” adyny Islandiýanyň wekili Sollis Wala Iwarsdottir, “Ýer Suw hanymy” adyny Wýetnamyň wekili Çin Mi An, “Ýer Ot hanymy” adyny bolsa Tailandyň wekili Wari Ngamkham aldy.
Umuman alanyňda, şu ýyl “Ýer hanymy” titulyna 78 gözel dalaş etdi.
Bäsleşik 2001-nji ýyldan bäri geçirilýär we “Dünýä hanymy”, “Älem hanymy” we “Interneşnl hanymy” bilen bir hatarda iň uly gözellik bäsleşikleriniň biri hasaplanýar. Ol gözellik bäsleşigi pudagyny “daşky gurşaw barada habarlylygy ýokarlandyrmagyň netijeli guraly hökmünde” ösdürmäge gönükdirilýär.
Bäsleşige gatnaşyjylar diňe bir gözellik boýunça däl-de, eýsem ekologiýa we daşky gurşawy goramak meseleleri baradaky bilimleri boýunça bäsleşýär. Bäsleşigiň ýeňijisi Ýer ýüzünde adamyň ýaşaýyş gurşawyny gorap saklamak maksatnamasyny (UNEP) ösdürmek meselelerinde BMG-niň wekili bolýar.
