4-nji noýabrda AFK-2 Çempionlar Ligasynyň toparlaýyn tapgyrynyň dördünji tapgyrynyň çäklerinde Türkmenistandan "Ahal" futbol topary Eýranyň "Sepahan" toparyna garşy myhmançylykda duşuşyk geçirdi. Oýun Yspyhan şäheriniň "Nagyş-e-Jahan" stadionynda geçirilip, deňme-deňlikde — 2:2 hasabynda tamamlandy.
Ýer eýeleri 9-njy minutda Araş Rezawandyň takyk urgusy bilen hasaby açdylar. Emma "Ahal" derrew ýagdaýy deňlemegi başardy: 27-nji minutda Süleýman Mirzoýew tapawutlandy. Ikinji ýarymda türkmen topary 62-nji minutda Bagtyýar Gürgenowyň urgusyndan soň öňe saýlandy. Ýöne birnäçe minutdan soň türkmen klubunyň goragçysy Azat Rahmanow ikinji sary duýduryşyny alyp, meýdançany terk etdi.
Mundan soň Yspyhan klubunyň oýunçylary myhmanlaryň jerime meýdançasyna hüjümleri guradylar. "Ahal" iň soňky pursata çenli gorandy, ýöne altynjy goşmaça minutda ýarymgoragçy Mohammad Askari hasaby deňlemegi başardy — 2:2.
Üç tapgyrdan soň "Sepahan" 4 utuk toplady. "Ahal" bolsa bu ýaryşda ilkinji utugyny gazandy. "C" toparçasynyň lideri Iordaniýanyň çempiony "Al-Husseýn" bolup galýar (2 oýunda 6 utuk). Bu kwartetdäki dördünji topar — Hindistanyň "Mohun Bagan" topary ozal ýaryşdan çetleşdirildi.
"Ahal" indiki duşuşygyny 23-nji dekabrda "Al-Husseýne" garşy myhmançylykda geçirer.
