Häzirki günde deňiz gatnawlary ähli ulag serişdeleriniň arasynda atmosferany esasy hapalaýjy çeşmeleriň biri bolup galýar. Gämileriň aglabasy häzirem dizel ýangyjyny ulanýar, ol bolsa ýanan wagty atmosfera diňe bir kömürturşy gazyny däl, eýsem beýleki köp sanly hapalaýjy maddalary zyňýar. Ekologiýa taýdan has arassa çözgütlere geçmek bolsa tehnologiýa kynçylyklary sebäpli aňsat däl diýip, New Atlas ýazýar.
Rolls-Royce kompaniýasy bu meseläni çözmek kararyna geldi we diňe metanolda işleýän dünýäde ilkinji ýokary öndürijilikli gämi hereketlendirijisini döretdi. Ol Woodward L’Orange we WTZ Roßlau gözleg merkezi bilen bilelikde meOHmare taslamasynyň çäklerinde işlenip düzülýär. Görkezme prototipini şu ýylyň dowamynda hödürlemek meýilleşdirilýär.
Hereketlendirijiniň aýratynlyklary barada maglumat entek ýok. Ýöne taslamanyň dizel ýangyjy bilen metanolyň arasynda geçiş çözgüdi hökmünde döredilýändigi, şol sebäpli hereketlendirijiniň ýangyjyň iki görnüşinde-de işläp biljekdigi belli. Ähtimal, gürrüň Rolls-Royce mtu Series 4000 modeliniň üýtgedilen wersiýasy barada bolup biler.
Metanolda işlemegi üçin hereketlendirijini doly gaýtadan işlemeli boldy. Metanolyň ýokary temperaturada öz-özünden ýanmaýandygy üçin, inženerler ýakma prosesini, turbina ulgamyny we elektron dolandyryşy üýtgetdi. Ýangyjyň ýaglamak ukybynyň pes bolmagy sebäpli, dizel hereketlendirijileri üçin mahsus bolan ýokary basyşly ýangyjy sepmek ulgamy gaýtadan işlendi. Şol bir wagtyň özünde, kompaniýa ýokary ýylylyk netijeliliginiň, kuwwatyň we ygtybarlylygyň saklanandygyny, ulanylyş çykdajylarynyň bolsa pes bolup galýandygyny belleýär.
Metanol ýakylanda uly ekologiýa artykmaçlyklaryny berýär: kükürt, azot oksidleriniň we gurumyň zyňyndylary düýpli azalýar. Ýangyç tebigata zyýan ýetirmezden dargaýar, bu hem onuň saklanmagyny we daşalmagyny aňsatlaşdyrýar. “Ýaşyl” metanol ulanylanda hereketlendiriji CO2 zyňyndylaryny asla goýbermezden işläp biler. Rolls-Royce-yň pikiriçe, şeýle tehnologiýalar deňiz pudagynda islegli bolup, olara maýa goýmak – arassa geljege maýa goýumdyr.
