Tehas ştatynyň (ABŞ) resmileri Johnson & Johnson (J&J) we onuň öňki bölümi Kenvue kompaniýasyna garşy kazyýete ýüz tutdy. Olaryň berýän aýyplamalaryna görä, kompaniýalar Tylenol (asetaminofen) dermanynyň çagalaryň arasynda autizmiň döremegine sebäp bolup biljek ähtimallygy barada maglumatlary gizläpdir.
Tehasyň baş prokurory Ken Pekstonyň arzasynda aýdylmagyna görä, kompaniýalar Tylenol derman serişdesini göwreli zenanlar üçin howpsuz hökmünde mahabat edipdirler. Emma garşy taraplaryň getiren ylmy görkezmelerine görä, göwreliligiň ir döwürlerinde asetaminofeni ulanmak çagada autizmiň ýüze çykma töwekgelçiligini ýokarlandyrýar.
Bu ýagdaý ABŞ-nyň Prezidenti Donald Trampyň ýakynda aýdan sözleri bilen hem baglanyşyklydyr. Ol sentýabr aýynyň ahyrynda özüniň adminstrasiýasy autizmiň sebäbini tapandygyny we muny parasetamol (asetaminofen) bilen baglanyşdyrandygyny aýdypdy. Bu beýanatlar ylmy jemgyýetçilik tarapyndan berk tankytlandy — olaryň pikiriçe, bu netijeler ylmy taýdan tassyklanmandyr we ynanarly däl.
Kenvue kompaniýasy bu “esassyz aýyplamalardan” kazyýetde özüni gorajakdygyny we asetaminofeniň howpsuzlygy barada dünýä jemgyýetçiliginde kabul edilen ylmy pikiri goldaýandygyny mälim etdi. Johnson & Johnson-nyň wekili bolsa, kompaniýanyň saglygy goraýyş dermanlary işini birnäçe ýyl mundan ozal bes edendigini we Tylenol ýaly reseptsiz satylýan serişdeler bilen baglanyşykly ähli hukuklaryň hem borçnamalaryň Kenvue kompaniýasyna degişli diýlip belledi.
Tehas hökümeti Kenvue we J&J kompaniýalaryndan arzada görkezilen 11 bozulmanyň her biri üçin 10 müň dollar töläp bermeklerini, şeýle hem Tylenol gaplarynyň üstünde autizmiň ýüze çykma töwekgelçiligi barada duýduryş ýazgysynyň ýerleşdirilmegini talap edýärler.
