Italiýaly tennisçi Ýannik Sinner Pariždäki “Masters” ýaryşynda ýeňiş gazanandan soň ýene-de dünýäniň birinji raketkasy boldy. Ol finalda kanadaly Feliks Ože-Alýassimi 6:4, 7:6 (7:4) hasabynda utdy.
Italiýaly türgen üçin bu ýeňiş Alýassim bilen bäş şahsy duşuşykda üçünji boldy. Mundan başga-da, bu onuň Fransiýanyň paýtagtyndaky ýaryşda ilkinji titulydyr.
Umuman, Sinner “Masters” ýaryşlarynda bäşinji we karýerasynda 23-nji titulyny gazandy. Ol ýapyk kortlarda ýeňişli tapgyryny yzygider 26 oýna çenli uzaltdy.
Şeýle-de, Sinner 1990-njy ýyldan bäri Pariždäki “Mastersde” bir setde-de utulman ýeňiş gazanan dördünji tennisçi boldy. Ozal şeýle üstünlige Stefan Edberg (1990), Rojer Federer (2011) we Nowak Jokowiç (2014, 2019) ýetipdi.
Ýeňiş Sinnere 1000 utuk we 946 müň ýewro baýrak getirdi. Indi ol ýaryşyň birinji tapgyrynda çykan Karlos Alkarasdan öňe geçip, ATP-niň reýtinginde ýene birinji orny eýelär.
