Microsoft 25H2 we 24H2 wersiýaly Windows 11 üçin KB5067036 täzelenmesini çykardy. Ol ozal Windows Insider programmasynyň çäklerinde synagdan geçirilen täzelenen “Başlat” (Пуск) menýusyny hödürledi.
Menýu ulanyjylar üçin has çeýe we amatly bolup, täze sazlama mümkinçiliklerini hödürleýär. Indi ulanyjylar interfeýsiň gerekmejek elementlerini gizläp, berkidilen we maslahat berilýän faýllaryň we programmalaryň görkezilmegini öçürip bilýär.
Indi ähli programmalaryň sanawyny iki usulda görüp bolýar: gözenek görnüşinde ýa-da kategoriýalar boýunça. Ilkibaşdaky ýagdaýynda programmalar kategoriýalara bölünen bolup, ulgam olary awtomatik ýagdaýda iOS we iPadOS-daky programmalar paneli ýaly aýratyn toparlara ýerleşdirýär. Şeýle-de, menýu ekrana görä sazlanýar: uly ekranly enjamlarda ol has köp ýarlyklary görkezýär.
Täzelenme Phone Link-iň paneline-de täsir etdi we indi soňky hereketler, habarnamalar, gelen jaňlar we habarlar görkezilýär. Mundan başga-da, “Ýumuşlar paneli” kämilleşdirildi: kursor işe girizilen programmalaryň nyşanyna eltilende olaryň eskizi indi animasiýa bilen peýda bolýar, akkumulýatoryň nyşanjygy bolsa indi göni ýumuşlar panelinde zarýad derejesini göterimde görkezýär.
KB5067036 bukjasy kem-kemden ýaýradylýar we häzirki wagtda hökmany hasaplanmaýar, bu ulanyjylaryň täzelenmäni elde gurnap biljekdigini ýa-da onuň hökmany bolmagyna garaşyp biljekdigini aňladýar. Prosesi çaltlaşdyrmak üçin soňky täzelenmeleri çykan badyna almaga mümkinçilik berýän funksiýany işjeňleşdirmeli.
