Russiýanyň «Roskosmos» döwlet korporasiýasy tälimçi-kosmonawt-synagçy Oleg Kononenkonyň Ý.A.Gagarin adyndaky Kosmonawtlary taýýarlamak merkeziniň başlygynyň wezipesini wagtlaýyn ýerine ýetiriji hökmünde bellenendigini habar berdi. Türkmenistanda doglan O.Kononenko mundan öň merkeziň başlygynyň orunbasary wezipesinde işleýärdi. Ol täze wezipäni 2025-nji ýylyň 10-njy noýabryndan ýerine ýetirip başlar.
Oleg Kononenko 1964-nji ýylyň 21-nji iýunynda Çärjew şäherinde (häzirki Türkmenabat) dünýä indi. Ol raketa-kosmiki pudagynda inženerçilikden başlap, Halkara kosmos stansiýasynda (HKS) topar serkerdesi derejesine çenli ýeten halkara derejeli kosmonawt.
Kononenko dünýä kosmonawtika taryhyna rekord eýesi hökmünde girdi. 2008–2024 ýyllar aralygyndaky bäş kosmos uçuşynyň dowamynda ol umumylykda 1110 gün 14 sagat 58 minut 37 sekunt wagt kosmosda bolmak boýunça dünýä rekordyny goýdy.
Şeýle hem, 2023–2024 ýyllardaky bäşinji uçuşynda Nikolaý Çub bilen bilelikde: 373 günlük üznüksiz kosmos uçuşynyň rekordyny goýdular.
Öz uçuşlary döwründe Kononenko 7 gezek açyk kosmos çykdy. Açyk kosmosda umumylykda 44 sagat 30 minut işledi.
Oleg Kononenko öz taýýarlygy we hyzmatlary üçin Türkmenistanda ýokary döwlet sylaglary - «Prezidentiň Ýyldyzy» ordeni (2009), Türkmenistanyň Gahrymany we «Altyn Aý» medaly (2019) bilen sylaglandy.
