Nýu-Ýorkdaky Metropoliten muzeýinde geçen Wall Street Journal Innovator Awards 2025 dabarasynda aýdymçy, “Gremmi” we “Oskar” baýraklarynyň eýesi Billi Aýliş söz bilen çykyş edip, onda milliarderleri pullary mätäç adamlara has işjeň bagyş etmäge çagyrdy.
“Häzir dünýäde ähli zatlar, hakykatdanam, örän erbet we örän ýowuz. Adamlar, aýratynam, biziň ýurdumyzda duýgudaşlyga we kömege öňküden has mätäç. Eger siziň puluňyz bar bolsa, ony ýagşylyga sarp etmek we mätäçlere paýlamak gowy bolardy. Men siziň hemmäňizi gowy görýärin, ýöne bu ýerde puly meňkiden has köp bolan birnäçe adam bar. Eger siz milliarder bolsaňyz, onda siz näme üçin milliarder?” – diýip, 23 ýaşly aýdymçy dabaradaky myhmanlara ýüzlendi. Olaryň arasynda Mark Sukerberg we onuň aýaly Prissilla Çan hem bardy.
Özüniň işjeň haýyr-sahawat işleri bilen tanalýan aktrisa baýlygyň diňe bir rahatlyk getirmän, eýsem hakyky üýtgeşmeler üçin gural bolup hyzmat etmelidigini belledi.
Aýdymçy öz sözlerini indiki hereketi bilen delillendirdi: dabaranyň alypbaryjysy Stiwen Kolber Aýlişiň azyk deňsizligine we howanyň üýtgemegine garşy göreşmek bilen meşgullanýan guramalara 11,5 mln dollar bagyş edendigini habar berdi. Bu ädim zalda uly el çarpyşmalary döredip, agşamyň iň köp gürrüňi edilen pursaty boldy.
Dabarada Aýliş “Aýdym-saz innowasiýalary üçin” baýrak aldy. Belläp geçsek, şol dabarada Prissille Çana hem kesellere garşy göreş üçin gurallary işläp taýýarlamak bilen meşgullanýan Chan Zuckerberg Initiative gaznasynyň işi üçin “Ylymda ýylyň haýyr-sahawatçysy” baýragy gowşuryldy. WSJ Çan bilen Sukerbergiň ömrüniň dowamynda haýyr-sahawat maksatlaryna Meta-daky paýnamalarynyň 99%-ini bagyş etmäge wada berendigini habar berdi.
