Awstraliýanyň Uorton-Biç kenarynda 1916-njy ýylda – Birinji jahan urşunyň möwç alan döwründe esgerler tarapyndan ýazylan iki hatly çüýşe tapyldy. Bu barada UPI habar berýär.
Çüýşäni Debra Braun we onuň gyzy kenary arassalap ýören wagty tapdy. Hatlar Malkolm Aleksandr Newille we Uilýam Kirk Harlä degişlidi. Aýal ýaltanmazdan tapyndy barada habar bermek we esgerleriň ykbalyny bilmek üçin sosial ulgamlar arkaly hatlaryň awtorlarynyň garyndaşlaryny gözläp tapdy.
Görlüp oturylsa, haty ejesine iberen Malkolm Newill ony ýazandan birnäçe aýdan soň Fransiýada heläk bolupdyr. Ol 28 ýaşynda eken. Onuň doganoglan agtygy öz daýysy barada 101 ýaşly daýzasyndan eşidendigini gürrüň berdi.
Uilýam Harli bolsa uruşdan dolanyp gelip, maşgala guran. Onuň häzirem ýaşap ýören bäş agtygy bar. Gyz agtyklarynyň biri Enn Týorner hatyň maşgalany birleşdirendigini belledi.
“Biz bu waka bolany bäri biri-birimiz bilen yzygiderli habarlaşýarys we muňa ynanyp bilemzok. Göräýmäge, atamyz o dünýäden bize gol uzadan ýaly” – diýip, ol gürrüň berdi.
Okeanografiýa professory Çarita Pattiaratçi çüýşäniň Uly Awstraliýa aýlagyndan iberilenden soň bary-ýogy birnäçe hepde suwda bolandygyny, soňra derrew kenara çykyp, şol ýerde 109 ýyl ýatandygyny çaklaýar.
