Türkmenistanyň Bazar Amanow adyndaky Döwlet çagalar kitaphanasynda Türkmenistanyň halk ýazyjysy, Magtymguly adyndaky Döwlet baýragynyň eýesi Gurbannazar Ezizowyň doglan gününiň 85 ýyllygy mynasybetli döredijilik duşuşygy boldy. Çärä kitaphananyň işgärleri hem-de çagyrylan myhmanlar gatnaşdylar. Olaryň arasynda şahyryň uly gyzy, «Türkmenistanyň gurluşygy we binagärligi» žurnalynyň redaktory Ýazgül Ezizowa hem bardy.
Gurbannazar Ezizow 1975-nji ýylyň 20-nji sentýabrynda, bary-ýogy 35 ýaşynda pajygaly aradan çykdy. Gysga ömrüne garamazdan, ol uly edebi miras galdyrdy. Onuň goşgulary eziz topragyň gözelligi we sahylygy bilen doly bolup, türkmen halkynyň durmuşyny we ykbalyny hem özünde jemleýär.
Şahyryň döredijilik mirasy häzirki günlerde hem adamlaryň kalbyny ýyladýar. Ýaş nesil onuň şygyr sungatyny işjeň öwrenýär, ýakynda bolsa onuň ykbalyna bagyşlanylan sahna oýny Magtymguly adyndaky milli sazly drama teatrynda görkezildi.
Duşuşygyň dowamynda şahyryň ömri we döredijiligi ýatlanyp, oňa gatnaşyjylar onuň öz döwrüniň pikirlerini ýürekden we metafora taýdan beýan etmäge ukyply aýratyn zehininiň bardygyny bellediler. Onuň goşgularynyň köpüsine saz ýazan beýik kompozitor Nury Halmämmedow bilen dostlugyna aýratyn üns berildi.
Gurbannazar Ezizowyň öçmejek şöhratynyň syry onuň döredijiliginiň çuňňur pelsepesinde, şahyrana keşpleriň köpdürlüligindedir. Kompozitor Daňatar Hydyrow hem şahyryň goşgulary esasynda döredilen köp sanly aýdymlaryň awtorydyr.
Medeni maksatnamany Maýa Kulyýewa adyndaky Türkmen milli konserwatoriýasynyň talyplarynyň çykyşy bezedi, olar şygyrlary dutaryň sazlaşygynda ussatlyk bilen ýerine ýetirdiler. Çäräniň ahyrynda myhmanlara şahyryň goşgular ýygyndysynyň täze neşiri sowgat berildi.
Ýubileý ýyly ýurdumyzyň ähli künjeklerdäki kitaphanalarda we okuw mekdeplerinde döredijilik duşuşyklary, ylmy maslahatlar we medeni çäreler bilen baýlaşdyryldy. Çäreler toplumy noýabr aýynda iň ýokary derejesine ýeter. Hut şonda Türkmenistanda halk ýazyjysynyň 85 ýyllygyna bagyşlanyp, giň gerimli aýdym-sazly dabara geçiriler.
