2025-nji ýylyň 5-nji noýabrynda Türkmenistanyň ýaşaýjylary täsin asman hadysasyna – “Samyr Aýyna” syn edip biler. Bu gezek noýabryň Superaýy öňkülerden has owadan bolmagy wada berýär, çünki ol ýylda iň uly hem iň ýagty dolan Aý bolar.
Astronomlaryň hasaplamalary boýunça, şol gün agşam Aý adatdakysyndan 7,9% uly we 16% ýagty görner. Hünärmenleriň maglumatlaryna görä, Aşgabatda dolan Aý 18:19 töweregi dogar we tutuş gije – 5-inden 6-njy noýabra çenli görner.
“Samyr Aýy” ady Demirgazyk Amerikanyň ýerli halklarynyň däp-dessurlaryndan gelip çykypdyr. Indeýler atlarda bellibir Aýyň aýratynlyklaryny görkezipdir. Noýabrda samyrlar bent gurup, iýmit ýygnaýar. Ähtimal, olaryň sowuk howa taýýarlygyny görüp, indeýler dolan Aýy olaryň şanyna atlandyrmak isländir. Başga bir pikire görä, ýylyň bu döwründe olar samyrlara duzak gurupdyr.
Dürli halklarda dolan Aýyň öz ady bar. Mysal üçin, Hytaýda ony Ak Aý diýip atlandyrýan bolsalar, keltler, tersine, Garaňky Aý diýip atlandyrýar.
