BMW Group 2025-nji ýylyň 1-nji noýabrynda Hytaýda geçiriljek BMW M Festival çäresinde täze BMW M3 Touring uniwersalyny ilkinji gezek görkezjekdigini habar berdi. Täze model M3 seriýasyna mahsus sport häsiýeti saklaýar, ýöne gündelik sürmek üçin has giň ýer we amatlylyk hödürleýär.
Täze M3 Touring-iň dizaýny has güýçli we dinamiki görnüşde jemlenipdir: kuzowdaky has anyk çyzyklar we giňeldilen teker arkalary sport häsiýetini güýçlendirýär. Salonda bolsa gyzyl bellikli täze sporty rul, gara bezeg elementleri hem-de iDrive 8.5 ulgamynda işleýän 12,3 we 14,9 dýuým ölçegli iki sany sanly ekran ýerleşdirildi.
Awtoulag 3,0 litrlik, goşa turbina bilen enjamlaşdyrylan alty silindrli hereketlendiriji bilen çykarylýar. Adaty wersiýanyň kuwwaty 353 kWt (480 at güýji), yzky teker hereketli. Competition wersiýasy 375 kWt (510 at güýji) öndürýär. Iň güýçli MxDrive modifikasiýasy 390 kWt (530 at güýji) berýär we ähli teker hereketli. Ähli wersiýalar 8 tizlikli M Steptronic transmissiýasy bilen üpjün edilýär.
Awtoulag sagatda 100 km tizlige bary-ýogy 3,6 sekuntda ýetýär — bu M3 Touring-i dünýäniň iň çalt uniwersallarynyň hataryna goşýar.
Kompaniýanyň bellemegine görä, täze M3 Touring sport dinamikasyny, maşgala üçin amatly giňişligi we gündelik ulanmak üçin rahatlygy üstünlikli utgaşdyrýar, bu bolsa tizligiň we praktikanyň deňagramlylygynyň täze derejesini görkezýär.
