Calvin Klein brendi Re-Calvin ady bilen geýim-gejimleri gaýtadan işlemek boýunça täze maksatnamasyny hödürledi diýip, WWD habar berýär.
Taslama alyjylara islendik brendleriň egin-eşiklerini we aksessuarlaryny gaýtadan ulanmak, gaýtadan işlemek ýa-da howpsuz ýok etmek üçin mugt tabşyrmaga mümkinçilik berýär. Maksatnamany döretmäge toplumlaýyn sortlama we aýlawly logistika bilen meşgullanýan Debrand kompaniýasy gatnaşdy. Geýim-gejimleri gaýtadan ulanmak ýa-da gaýtadan işlemek mümkin bolmadyk ýagdaýynda, galyndylar bio-ýangyja öwrüler.
Re-Calvin-iň aýratynlygy taslamanyň, adatça, şeýle maksatnamalara goşulmaýan kategoriýalary – içki geýimleri we suwa düşülýän geýimleri hem kabul edýänligidir.
Şeýle başlangyçlar meşhur brendleriň arasynda barha giňden ýaýraýar. Mysal üçin, Chanel Monakonyň Ylmy merkezi bilen hyzmatdaşlygyny alty ýyl uzaldýar. Hyzmatdaşlyk Ortaýer deňziniň gyzyl merjenlerini gorap saklamaga gönükdirilendir.
