20-nji oktýabrda Nýu-Ýork şäherinde Türkmenistan bilen Botswana Respublikasynyň arasynda diplomatik gatnaşyklary ýola goýmak hakyndaky Bilelikdäki Beýanata gol çekmek dabarasy boldy. Dabara Türkmenistanyň Birleşen Milletler Guramasynyň ýanyndaky hemişelik wekilhanasynyň binasynda geçirildi.
Türkmenistanyň DIM-niň habar bermegine görä, dabaranyň öňüsyrasynda Türkmenistanyň BMG-niň ýanyndaky Hemişelik wekili Aksoltan Ataýewa bilen Botswana Respublikasynyň BMG-niň ýanyndaky Hemişelik wekili Çarlz Masoleniň arasynda gepleşikler geçirildi.
Taraplar iki ýurduň arasyndaky dostlukly gatnaşyklary pugtalandyrmaga, şeýle hem syýasy, ykdysady we ynsanperwer ugurlarda ikitaraplaýyn hyzmatdaşlygy ösdürmäge, guramalaryň ugry boýunça, ilkinji nobatda BMG-niň çäklerindäki halkara hyzmatdaşlygy giňeltmäge bolan özara gyzyklanmalaryny tassykladylar.
Duşuşykda ikitaraplaýyn hem-de köptaraplaýyn gatnaşyklaryň ösdürilmeginiň mümkinçilikleri ara alnyp maslahatlaşyldy. Taraplar BMG-niň gün tertibinde özara gyzyklanma döredýän meseleler boýunça pikir alyşdylar.
Duşuşygyň barşynda ilçi A.Ataýewa Türkmenistanyň Hökümetiniň adyndan Botswana Respublikasynyň Hökümetini Halkara parahatçylyk we ynanyşmak ýylyna, Halkara bitaraplyk gününe hem-de Türkmenistanyň hemişelik Bitaraplygynyň 30 ýyllygyna bagyşlanan ýokary derejedäki halkara foruma gatnaşmaga çagyrdy.
Duşuşygyň ahyrynda taraplar Türkmenistan bilen Botswana Respublikasynyň hökümetlerini we halklaryny diplomatik gatnaşyklaryň ýola goýulmagy bilen gutlap, bu ädimiň ikitaraplaýyn gatnaşyklaryň mundan beýläk-de berkemegine we uzakmöhletleýin hyzmatdaşlygyň ösdürilmegine möhüm itergi berjekdigini nygtadylar.
