JerryRigEverything YouTube kanalyndan bloger Zak Nelson hytaý flagmanlaryny seýrek synagdan geçirýär. Ýöne täze Xiaomi 17 Pro Max kadadan çykma boldy.
6,3 dýuým ekranly smartfon daşky görnüşi boýunça iPhone 17 Pro-ny ýada salýar, ýöne yzky paneldäki kamera blogunda oturdylan ikinji displeýi bilen tapawutlanýar.
Smartfonyň öň bölegi Dragon Glass 3.0 aýnasy bilen goralýar. Ol Moos şkalasy boýunça 7-nji derejede çyzylyp başlady – bu Apple-iň birneme gowy netije görkezen Ceramic Shield 2 aýnasy ýalydyr. Yzky panel o diýen çydamly däl: onuň aýnasy eýýäm 6-njy derejede çyzylyp başlady.
Flagman smartfonyň ýene bir aýratynlygy yzky gapagyň aýnadan däl-de, plastikden bolmagydyr. Ýöne enjamyň korpusy anodirlenen alýuminden ýasaldy. Plastik ýere gaçanda seýrek çat açsa-da, onuň premium smartfonda ulanylmagy has gymmat materiallara öwrenişen alyjylarda sorag döredip biler.
Egreltme synagynda Xiaomi 17 Pro Max özüni gowy görkezdi – korpus üýtgemezden bu synagdan geçdi.
Syn bermegiň ahyrynda Nelson smartfony söküp, detallaryň tertipli ýerleşendigini we ýokary hilli ýygnalandygyny belledi. Sökme goşmaça ekranyň yzky aýnanyň aşagynda ýerleşendigini we nurbatlaryň kömegi bilen metal plastina berkidilendigini görkezdi.
