General Motors konserni ABŞ-da elektrik ulaglaryny satyn almak üçin 30-njy sentýabra çenli güýji bar bolan federal salgyt ýeňillikleriniň ýatyrylmagy netijesinde, takmynan 1,6 milliard dollar ýitgi çeker diýip çaklaýar. Bu barada kompaniýanyň ýolbaşçylaryna salgylanyp, Carscoops neşiri habar berýär.
Ýitgileriň esasy bölegi konserniň önümçilik meýilnamalaryna girizilýän düzedişler bilen baglanyşyklydyr. GM-niň bellemegine görä, hökümet tarapyndan goldawyň yzyna alynmagy elektrik ulaglary bazarynda üýtgeşmelere, şol sanda islegiň peselmegine sebäp bolup biler. Şunuň bilen baglylykda kompaniýa batareýa bilen işleýän ulaglaryň önümçiligine we täze elektrik modelleriniň işlenip taýýarlanylmagyna degişli meýilnamalaryny täzeden gözden geçirýär.
Täze strategiýanyň durmuşa geçirilmegi azyndan 1,2 milliard dollar çykdajy talap eder. Galyan ýitgiler bolsa ozal baglaşylan şertnamalaryň ýatyrylmagy bilen düşündirilýär. GM gelejekde bu çykdajylaryň hasam artmagynyň ähtimaldygyny hem boýun alýar.
Şeýle-de bolsa, kompaniýanyň elektrik ulaglarynyň satuwy ýylyň üçünji çärýeginde ep-esli artdy: iýul–sentýabr aralygynda satylan ulaglaryň sany 100 %-den gowrak ýokarlandy. Chevrolet brendi ABŞ-da batareýaly ulaglaryň satuwy boýunça ikinji orny eýeledi, a Chevrolet Equinox EV modeli bolsa Tesla hataryny hasaba almazdan, iň meşhur elektrik krossoweri boldy.
