21-nji oktýabrda Eýran Yslam Respublikasynyň Yspyhan şäherindäki «Nakş-e-Jahan» stadionynda Aziýanyň Futbol Konfederasiýasynyň Çempionlar ligasy–2-niň toparlaýyn tapgyrynyň oýny geçirildi. Türkmenistanyň milli çempionatynyň kümüş medalynyň eýesi «Ahal» kluby eýranly «Sepahan» bilen duşuşykda 0:1 hasabynda ýeňildi.
Duşuşygyň ýeke-täk goluny 82-nji minutda Kawe Rezaeý geçirdi.
Ýer eýeleri duşuşygyň ilkinji minutlaryndan hüjüme başladylar. 9-njy minutda Aref Hadjidi hasaby açmaga golaý boldy. Eýranly topar oýny doly gözegçilikde saklap, birnäçe howply pursatlary döretdi, ýöne türkmen toparynyň derwezebany birnäçe gezek toparyny halas etdi.
Birinji ýarymda «Sepahan» iki gezek gola golaý boldy: Amin Hazbawi topy derwezä gönükdirip bilmedi, 37-nji minutda bolsa Araş Rezawandyň kellesi bilen uran topy derwezäniň diregine degdi. Ikinji ýarymda hem Berdiýew birnäçe gezek oýna goşulyp, halas etmeli boldy.
Bagtyýar Gürgenowyň we Oraz Orazowyň ynamly oýnuna garamazdan, «Ahal» deňme-deňligi saklap bilmedi. Oýnuň tamamlanmagyna sekiz minut galanda Berdiýew Enzo Kriweliniň urgusyny gaýtardy, emma Kawe Rezaeý ilkinji bolup topa ýetişip, ýeňiş goluny geçirdi.
Bu ýeňlişden soň «Ahal» C toparynda üçünji orunda, ýöne hasapda utuksyz galýar. Topar öň «Mohan Bagan» (Hindistan) klubuny ýeňipdi, emma hindi klubuna diskwalifikasiýa berlendigi üçin netijeler ýatyryldy. «Sepahan» üç utuk toplap ikinji orunda barýar, Iordaniýadan gelen «Al-Huseýn» kluby bolsa alty utuk bilen «C» toparyna liderlik edýär.
