20–24 oktýabr aralygynda Türkmenistanda brusellýozyň öňüni almak, anyklamak we gözegçilik etmek boýunça okuw türgenleşigi geçirilýär. Bu barada Türkmenistanyň Oba hojalyk ministrliginiň Döwlet weterinariýa gullugy habar berdi.
Çäre BMG-niň Azyk we oba hojalyk guramasy (FAO) tarapyndan sebitleýin GCP/SEC/027/PAF taslamasynyň çäginde — “Bitewi saglyk” ýörelgesine esaslanýan pandemiýalara taýýarlyk we jogap çäreleri mowzugy boýunça guraldy.
Okuw türgenleşigine dürli ministrlikleriň we pudaklaýyn edaralaryň wekilleri, şeýle hem weterinariýa we lukmançylyk ulgamlarynyň hünärmenleri gatnaşýarlar. Bu bolsa Türkmenistanyň adam we haýwan saglygyny goramak boýunça toplumlaýyn çemeleşmä aýratyn ähmiýet berýändigini görkezýär.
Sapaklary FAO-nyň halkara hünärmenleri — Swetlana Bardenşteýn we Nadaw Galon alyp barýarlar. Olar epizootik gözegçilik, anyklama we haýwanlaryň arasynda ýokanç keselleriň öňüni almak babatda köp ýyllyk tejribä eýe.
Türkmen tarapyndan çykyş eden Döwlet weterinariýa gullugynyň halkara we ylmy aragatnaşyklary bölüminiň müdiri, milli hünärmen Arslan Soltanmyradow ýurdumyzda mallaryň saglygyny goramak syýasaty, brusellýozyň öňüni almak boýunça çäreler we hökümet tarapyndan laboratoriýa mümkinçiliklerini berkitmek hem-de weterinariýa işgärleriniň hünär derejesini ýokarlandyrmak boýunça edilýän işler barada gürrüň berdi.
Halkara hünärmenler gatnaşanlara brusellýoz boýunça sebit we dünýä derejesindäki ýagdaýlar, şeýle hem döwrebap anyklama, sanjym we ir duýduryş usullary barada maglumat berdiler.
Bu okuw türgenleşigi FAO bilen Türkmenistanyň arasyndaky hyzmatdaşlygyň möhüm basgançagy bolup, onuň maksady zoonoz keselleriň öňüni almak, epizootiki gözegçilik ulgamyny ösdürmek we ýurduň azyk howpsuzlygyny üpjün etmekdir.
