Ferrari kompaniýasy awtomobil duran ýerinden hereket edip başlanda, hereketlendirijiniň kuwwatyny dogry paýlaýan funksiýanyň – Launch Control ulgamyny işjeňleşdirmegiň üýtgeşik usulyna patent almak üçin arza berdi.
Resminamalara görä, adaty düwmeleriň ýa-da multimedia menýusynyň deregine sürüji awtomobiliň üçegindäki ýörite tutary çekip, ulgamy işjeňleşdirip biler. Munuň üçin bir wagtyň özünde tormoz pedalyny basyp saklamak we tutary aşak çekmek gerek. Şondan soň yşyk görkezijisi ýanýar, displeýde bolsa ulgamyň taýýardygy barada habar peýda bolýar. Şondan soň proses adatdakysy ýaly: sürüji gazy doly basýar we tormozy goýberýär.
Bu çemeleşme awtomobiliň duran ýerinden bat almagyny ýönekeýleşdirip biler. Çünki, çylşyrymly interfeýsi bolan awtomobillerde Launch Control-y işjeňleşdirmek, adatça, birnäçe hereketi talap edýär.
Ferrari munuň entek konsepsiýadygyny, ýöne kompaniýanyň tehnologiýalary, rahatlygy we sürmek lezzetini utgaşdyryp, 2026-njy ýylyň sportkarlary üçin innowasion çözgütleri gözleýändigini belledi.
