19-njy oktýabrda, ýekşenbe güni Ostindäki Circuit of the Americas ýaryş ýolunda Formula-1 çempionatynyň 19-njy tapgyry – ABŞ-nyň Gran-prisi geçdi. Onda “Red Bulluň” niderlandly sürüjisi Maks Werstappen ýeňiş gazandy. Ikinji bolup pellehana “Maklarenden” britaniýaly Lando Norris geldi, üçlügi ýaryşyň ahyrynda ikinji orny elden gidiren Şarl Lekler (“Ferrari”) jemledi.
Şeýle-de, ilkinji bäşlige Lýuis Hemilton (“Ferrari”) we Oskar Piastri (“Maklaren”) girdi. Ostindäki tapgyrdan soň şahsy sanawyň lideri Oskar Piastri 346 utuk bilen birinji orny saklaýar, ýöne Norris indi bary-ýogy 14 utuk tapawut, Werstappen bolsa 40 utuk tapawut bilen ondan yza galýar.
Titula eýe bolmak mümkinçiligini Jorj Rassell (“Mersedes”) hem saklaýar, onuň aratapawudy 94 utuk. Lekler göreşden doly çykdy.
Konstruktorlaryň kubogynda ikinji orun üçin göreş dowam edýär: “Mersedes” 341 utuk bilen “Ferrariden” bary-ýogy ýedi utuk, “Red Bull” bolsa on utuk öňe geçýär. “Maklaren” 678 utuk bilen oktýabryň başynda Singapuryň Gran-prisinden soň möhletinden ir çempion bolupdy.
