Dünýäde meşhur YouTube blogeri MrBeast (Jimmi Donaldson) MrBeast Financial ady bilen maliýe tehnologiýalary kompaniýasyny döretmegi meýilleşdirýär. Business Insider-iň habar bermegine görä, ol degişli haryt nyşanyny hasaba aldyrmak üçin ABŞ-nyň Patent we haryt nyşanlary býurosyna arza berdi.
Resminamalarda kompaniýanyň talyp karzlaryndan we ätiýaçlandyryşdan başlap, karz seljermesine çenli dürli hyzmatlary hödürläp biljekdigi görkezilýär. Şeýle-de, maliýe, bank, maslahat beriş we kriptowalýuta hyzmatlary üçin ykjam programmany we onlaýn platformany çykarmak meýilnamalary göz öňünde tutulýar.
Neşiriň maglumatlaryna görä, Donaldson taslamany eýýäm bar bolan finteh kompaniýasy bilen hyzmatdaşlykda durmuşa geçirip, onuň infrastrukturasyndan peýdalanmak we düzgünleşdirmekde bolup biljek meseleleriň öňüni almak isleýär.
Bu ädimler 2025-nji ýylyň ýazynda hödürlenen maýadarlyk tanyşdyrylyşy bilen gabat gelýär. Onda MrBeast toparynyň maliýe hyzmatlary bazaryna çykmak isleýändigi barada aýdylypdy. Häzirlikçe MrBeast Financial kompaniýasynyň işe giriziljek senesi aýdylmaýar, ýöne Business Insider neşiri haryt nyşany üçin arza berýän kompaniýalaryň ony hakyky iş ýüzünde ulanmak niýetini tassyklamalydygyny belleýär.
