Amazon MGM Studios ABŞ-nyň birinji hanymy Melaniýa Tramp hakynda dokumental film taýýarlaýar diýip, Variety habar berýär. Filmiň çykjak senesi 2026-njy ýylyň 30-njy ýanwaryna meýilleşdirilýär.
Filme “Dykyn wagty” («Час пик») atly gülküli boýewik bilen tanalýan režissýor Brett Ratner ýolbaşçylyk eder. Filmiň wakasy 2025-nji ýylda prezidentiň kasam kabul etmegine 20 gün galanda bolup geçýän döwrüň çäginde birinji hanymyň durmuşyny beýan edýär.
Taslama tomaşaçylara “Melaniýa Trampyň dünýäsine çümüp, onuň kasam kabul ediş dabarasyna taýýarlyk görşüni, Ak tamdaky geçiş döwrüniň kynçylyklaryny ýeňip geçişini we maşgalasy bilen jemgyýetçilik durmuşyna gaýdyp gelşini synlamaga mümkinçilik berýär”.
Döredijileriň belleýişine görä, filmde möhüm duşuşyklaryň hem-de şahsy gepleşikleriň özboluşly kadrlary ýerleşdiriler. ABŞ-nyň birinji hanymy Melaniýa Tramp filmiň bilelikdäki prodýuseri hökmünde çykyş edipdir.
Kinoteatrlarda görkezilenden soň film Prime Video akym hyzmatynda elýeterli bolar. Mundan başga-da, onuň üstüni üç bölümli dokumental taslama-da ýetirer. Ol Melaniýanyň Nýu-Ýorkdaky Tramp diňi bilen Palm-Biçdäki Mar-a-Lago myhmanhanasynyň we Waşington şäheriniň arasyndaky syýahatlary barada gürrüň berýär.
