AstraZeneca farmasewtika kompaniýasy täze taýýarlan baxdrostat atly eksperimental serişdesiniň soňky kliniki synaglardan üstünlikli geçendigini we bejermesi kyn gipertoniýaly näsaglarda gan basyşy peseltmäge kömek edendigini mälim etdi. Bu barada Reuters habarlar gullugy ýazýar.
12 hepdelik kliniki barlagyň dowamynda näsaglara adaty bejergä goşmaça 2 mg baxdrostat berildi. Derman gan basyşyny kadalaşdyrýan aldosteron gormonyna täsir edýär, şonuň üçin onuň hereket mehanizmi adaty diuretiklerden we ACE ingibitorlaryndan tapawutlanýar.
Kompaniýa serişdäni ýylyň ahyryna çenli bellige almak üçin ýüz tutmagy meýilleşdirýär we onuň ýyllyk satuwlarynyň 5 milliard dollardan geçjekdigini çaklaýar.
Şol bir wagtyň özünde baxdrostat dowamly böwrek keselini bejermekde hem-de ýürek ýetmezçiliginiň öňüni almakda ulanylmagy boýunça öwrenilýär.
Bu derman serişdesiniň işlenip taýýarlanylmagy AstraZeneca-nyň 2023-nji ýylda ABŞ-nyň CinCor Pharma kompaniýasyny satyn almasyndan soň ýürek-damar keselleri boýunça toplumyny giňeltmek strategiýasynyň bir bölegine öwrüldi.
