Internet torunda täze VR garniturasynyň – Project Moohan hökmünde belli bolan Samsung Galaxy XR-yň suraty we tehniki aýratynlyklary peýda boldy. Suratlary Android Headlines neşiri hödürledi.
Galaxy XR garniturasy Google-dan Android XR platformasyna esaslanýar we kompýutere ýa-da smartfona birikmezden awtonom işleýär. Ol bir dýuýma 4032 piksel dykyzlygy bilen micro-OLED 4K displeýine eýe boldy. Pikselleriň umumy sany, takmynan, 29 mln bolup, bu Apple Vision Pro-dan köpdür.
Öndürijilige Samsung we Google bilen bilelikde döredilen Qualcomm-yň Snapdragon XR2+Gen 2 prosessory jogap berýär. Ol her göz üçin 4,3K çenli durulykda şekili görkezmäge, giňişlikdäki sesi goldamaga, hereketi yzarlamaga we emeli aň algoritmlerini işe girizmäge mümkinçilik berýär.
Garnitura hereket, gözüň hereketi we ses buýruklary bilen dolandyrylýar. Korpusda eliň we gözüň hereketini yzarlamak üçin köp sanly sensorlar we kameralar, şeýle-de ulanyjynyň töweregindäki giňişligi seljerýän çuňluk datçigi ýerleşdirildi.
Enjamyň agramy – 545 gram. Garnitura rahatlyk üçin ýumşak ýassyga, sazlanýan kemere we daşky ýagtylyga garşy aýrylýan perdä eýe boldy. Onuň sag tarapynda iki gezek basylanda VR režimi bilen içinden görmek režimini üýtgedýän, uzak basylanda bolsa kontenti merkezleşdirýän sensor paneli ýerleşýär.
Korpusyň ýokarky panelinde iki düwme bar: çepdäki sesiň sazlanmagyna jogap berýär, sagdaky (Top button) bir gezek basylanda launçeri açýar, basyp saklananda Google Gemini kömekçisini işledýär. Iki sany 6DoF kontrolleri-de göz öňünde tutuldy.
Syzma maglumatlaryň arasynda One UI XR ulanyjy interfeýsiniň ekran suratlary bar. Launçer Samsung-yň firma programmalaryny we Google hyzmatlaryny, şeýle-de Netflix ýaly başga programmalary görkezýär. Interfeýsiň ýokarky böleginde Home, Google we Gemini nyşanlary hem-de şlemiň parametrlerini dolandyrmak üçin goşmaça elementler bar.
Garnitura wideo görlende 2,5 sagada çenli we işjeň ulanylanda 2 sagat töweregi işläp bilýär. Audioulgam her tarapda iki dinamik görnüşinde boldy: giňişlikdäki ses goldawy nauşniksiz oňmaga mümkinçilik berýär.
