Koloradodan (ABŞ) VibeLens kompaniýasy dünýäde ekşn-kameraly ilkinji nauşnigi – MusicCam-y hödürledi. Häzir gajet KickStarter-de deslapky sargyt üçin elýeterli, doly satuw 2025-nji ýylyň dekabrynda başlar.
Nauşnik “süňk arkaly geçirijilik” boýunça işleýär we işjeň durmuş ýörelgesine eýerýän adamlar üçin niýetlenendir. Garnituranyň sag tarapynda 2K durulyk, 180° syn ediş burçy we ±30° gyşartma sazlamasy bilen Sony IMX219 kamerasy oturdyldy. Şeýle-de, 6 okly durnuklaşdyrma we surata düşürilende ýanýan gyzyl indikator bar.
MusicCam doly suw geçirmeýän bolup, ony 20 metre çenli çuňluga çümdürip bolýar, bu hem basseýnde ýa-da snorkling wagty wideo düşürmäge mümkinçilik berýär. Ähli ýazgylar microSD-de saklanýar ýa-da smartfona iberilýär.
Garnitura suraty, tekste öwürmek mümkinçiligi bilen ses ýazgysyny we sensor dolandyryşy goldaýar. Goşmaça EA sesi basyş, 100-den gowrak dile terjime, ylgaw we welosiped sürmek üçin nawigasiýa, şeýle-de 5.4 wersiýaly Bluetooth birleşmesi bar. Onuň agramy bary-ýogy 50 gram.
600 mA/sag sygymly batareýa 2,6 sagada çenli wideo düşürmäge, 24 sagat ses ýazmaga ýa-da 15 sagat aýdym diňlemäge mümkinçilik berýär. Doly zarýad almak üçin 20 minut töweregi wagt gerek.
MusicCam-yň resmi bahasy 399 dollar, ýöne deslapky sargytlaryň çäklerinde KickStarter-de nauşnigi 199 dollara satyn alyp bolýar. Gara we mämişi reňkler elýeterlidir.
