Şwesiýanyň Einride kompaniýasy kabinasyz özbaşdak elektrik ýük ulagyny ilkinji gezek halkara gatnawyna iberdi. Ulag Ýewropanyň demirgazygyndaky iň bir köp gatnawly serhet geçelgesi arkaly Şwesiýa bilen Norwegiýanyň araçäginden geçdi.
Synag Norwegiýanyň gümrük gullugy bilen bilelikde geçirildi. Einride ulgamy sürüji gatnaşmazdan, ýükleri öňünden deklarirlemäge mümkinçilik berýän Digitoll sanly platformasyna birleşdirildi. Ähli amallar awtomatiki usulda ýerine ýetirildi – gatnawyň hiç bir tapgyrynda ýük ulagynyň dolandyrylyşyna adam gatnaşmady.
Ýük ulagynyň kabinasy ýok, bu ýük üçin niýetlenen meýdany giňeldýär we ulagyň agramyny azaltmaga mümkinçilik berýär. Ulagy dolandyrmak Einride Driver programma üpjünçiligi toplumy we awtoulagyň hakyky wagtda gidişine gözegçilik edýän uzakdan dolandyryş bölümi arkaly amala aşyrylýar. Taslama Ýewropanyň awtonom ulaglary ösdürmegi maksat edinýän MODI başlangyjynyň çäklerinde durmuşa geçirildi.
Taslamanyň tehniki direktory Henrik Grin munuň "awtonom ulaglaryň indi geljekki zat däl-de, şu wagtky hakykatdygyny görkezýän möhüm tapgyrdygyny" belledi. Einride 2019-njy ýyldan bäri sürüjisiz ulaglary işjeň ösdürýär we dünýädäki iň uly elektrik ýük torlaryndan birini dolandyrýar. 100 million dollar serişdäni çekmek bilen, kompaniýa global giňelişe we belki-de ABŞ-nyň biržasyna çykmaga taýýarlanýar.
