Ilon Mask eýýäm iki hepdeden Grok AI çat-botunyň esasynda täze onlaýn ensiklopediýany – Grokipedia-ny işe girizmek meýilnamalary barada aýtdy. Milliarderiň aýtmagyna görä, bu taslama “Wikipedianyň” ornuny tutup, çäklendirmesiz hemmeler üçin elýeterli bolar.
“0.1 wersiýada Grokipedia-nyň irki beta-wersiýasy iki hepdeden hödürlener” – diýip, Mask X sosial ulgamynda ýazdy.
Taslama Maska degişli bolan xAI startapy tarapyndan işlenip taýýarlanýar. Kompaniýa 2025-nji ýylyň iýulynda Grok çat-botunyň soňky wersiýasyny – Grok 4-i çykardy. Tanyşdyrylyşda Mask ony “dünýäde iň ösen emeli aň” diýip atlandyrdy we onuň “ähli ugurlardaky aspirantlaryň ählisinden diýen ýaly akyllydygyny” aýtdy.
Maskda hususy ensiklopediýasyny döretmek pikiri “Wikipedia” bilen dawasyndan soň peýda boldy. Ol 2024-nji ýylda meşhur ensiklopediýanyň döredijilerini syýasy tarapgöýlükde aýyplady. “Wikipedianyň” egindeş esaslandyryjysy Jimmi Ueýls hem Masky X sosial ulgamyndaky senzura üçin tankytlady.
