Microsoft özüniň 50 ýyllyk ýubileýiniň şanyna rowaýaty Windows XP-dan ylhamlanan dizaýnly, çäkli nusgadaky krokslar toplumyny hödürledi. Bu aýakgabyň resmi utuşly oýny 7-nji oktýabrda bolar.
Awgust aýynda bu kompaniýa adaty bolmadyk goýberiliş yglan edipdi, indi bolsa köne operasion ulgamynyň tanalýan elementleri basylan öňi ýapyk şypbyklary resmi taýdan görkezdi. Dizaýn ýaşyl depeli we mawy asmanly meşhur Bliss (“Aňrybaş eşret”) diwar fonundan ylham aldy.
Krokslarda Windows XP-iň däp bolan nyşanjyklary: sebet, syçanjygyň kursory, MSN kebelek, “Meniň resminamalarym” bukjasy, Internet Explorer brauzeriniň nyşany we hatda Clippy wirtual kömekçi hem şekillendirilen. Topluma "Aňrybaş eşret" peýzažly aýakgap salynýan halta hem girýär.
The Verge-iň ýazmagyna görä, krokslary satyn alyp bolmaýar, olary diňe utup bolýar. Utuşly oýun 7-nji oktýabrda, Ýuwaş ummany wagty bilen sagat 11:59-da (Aşgabat wagty bilen ertesi sagat 11:59) Instagram-da geçer. Gatnaşmak üçin postuň aşagyna laýk goýmaly we #MicrosoftCrocSweepstakes heştegli teswir ýazmaly.
