Google iFixit bilen hyzmatdaşlykda Pixel 10 seriýaly smartfonlar üçin asyl nusgadaky bölek şaýlary satyp başlady. Indi smartfon eýeleri we garaşsyz abatlaýyş hyzmaty merkezleri resmi bölek ätiýaçlyk şaýlaryny we jikme-jik gözükdirmeleri ulanyp, enjamlaryny özleri abatlap bilerler diýip, 9to5Google ýazýar.
Bölek şaýlaryň bahalary dürlüçe üýtgedi. Pixel 10 Pro-yň ekrany has ýagty paneli sebäpli has gymmatlady, yzky aýna bolsa 7 dollar galdy, belki-de, Qi2 simsiz zarýad beriş standartynyň magnitleri sebäpli şeýle bolandyr diýip çaklanýar. Şol bir wagtda, batareýa 10 dollar, esasy kamera bolsa 60 dollar arzanlady, sebäbi Google ozalky datçikleri ulanyp, diňe şekiliň durnuklaşmagyny gowulandyrdy.
Esasy Pixel 10-nyň hem ekrany gymmatlady, yzky aýnanyň bahasy bolsa 30 dollar galdy. Şonuň bilen birlikde, yzky kameralar toplumy, goşmaça teleobýektiwiň goşulandygyna garamazdan, 159,99 dollar derejesinde galdy.
Kompaniýa, Pixel 10 Pro XL-i hem goşmak bilen, ähli modeller üçin ädimme-ädim abatlaýyş gözükdirmelerini çap etdi.
16-njy oktýabrda Google ABŞ-da Halkara abatlaýyş gününe gabatlap "Bilimler güni: abatlamak arkaly ömrüni uzaldyp bolýan önümlerimizi döredýäris " atly çäre geçirer. Şol ýerde Pixel-i, Pixel Watch-i we Pixel Buds-i nädip abatlamalydygy görkeziler we enjamlaryň ömrüni uzaltmakda elýeterli abatlaýyş işleriniň orny ara alnyp maslahatlaşylar.
