Dubaýyň sürüjisiz ulaglary ösdürmek boýunça uly meýilnamalary bar. 2025-nji ýylyň ahyryna çenli şäheriň köçelerinde ilkinji robotaksiler gatnap başlar we indiki tapgyrda 2026-njy ýylda 15 kilometrlik awtonom ulag zolagynyň açylyşy bolar. Muny Ýollar we ulag gullugy (RTA) Dubaýda geçen Sürüjisiz ulagly daşamalar boýunça dünýä kongresinde yglan etdi.
Zolak şäheriň üç etrabyny birleşdirer: Al Jaddaf metro bekedi, Dubai Festival City we Dubai Creek Harbour. Bu ýerde sürüjisiz ulaglaryň dürli görnüşleri: metro otlulary, awtobuslar, ýük awtoulaglary, kommunal ulaglar, eltip beriji robotlar we hatda awtopilotly suw taksileri gatnajak iri ulag merkezi dörediler. Ýolagçylar tizligine, bahasyna we amatlylyk derejesine baglylykda syýahatyň amatly görnüşini saýlap bilerler.
Bu zolakda ilkinji robotaksiler 2026-njy ýylyň birinji çärýeginde işe başlar we olaryň test synaglary şu ýylyň ahyryna çenli başlanar. Geljekde hökümet şäheriň beýleki ýerlerinde hem şuňa meňzeş zolaklary döretmegi meýilleşdirýärler.
Emirligiň strategiýasyna görä, 2030-njy ýyla çenli Dubaýdaky jemgyýetçilik ulaglarynyň dörtden bir bölegi sürüjisiz ulaglardan ybarat bolmaly we 2040-njy ýyla çenli bu paý 36%-e çenli ýokarlanar.
RTA Hytaýyň Baidu kompaniýasy bilen hyzmatdaşlyk edýär we 2028-nji ýyla çenli şäheriň ýollaryna müňlerçe sürüjisiz taksileri çykarmagy meýilleşdirýär. Häzirki wagtda Dubaýda Apollo Go ulaglary synagdan geçirilýär: 50 ulag maglumat ýygnaýar we howpsuzlyk barlaglaryndan geçýär. Täze ulgam heläkçilikleri azaldyp, ulag ulgamynyň netijeliligini ýokarlandyrar diýlip garaşylýar.
